Accessibility links

Abdullah Abdullah Kite Kous Alaprezidans la Nan Afghanistan


Kandida afghan alaprezidans Abdullah Abdullah anonse li pap patisipe nan dezyèm tou eleksyon 7 novanm nan anfas prezidan Hamid Karzai. Li akize gouvènman an deske li pa satisfè demann li fè pou asire onètete vòt la.

Abdullah di li retire kò li nan kous la pou pwoteste kont sa li rele "move konduit gouvènman an ak Komisyon Elektoral Endepandan an".

Ansyen minis afè etranjè Afghanistan an te bay prezidan Karzai jiska samdi 31 oktòb pou l' revoke prezidan Komisyon Elektoral la pou evite yon repitisyon gwo magouy ki te fèt nan eleksyon 20 out 2009 la.

Dat sa a pase san prezidan Karzai pa pran okenn mezi.

Apre anons li kite konpetisyon an dimanch premye novanm nan, Abdullah ekzòte patizan li yo pa pran lari e pou yo pa chagren akò desizyon sa a, li di ki se yon desizyon difisil. E li ajoute "Pou koumanse, se pa yon anviwonman demokratik. Men an menm tan, se yon desizyon pou yon bon kòz. Se pou avni pwochen jenerasyon peyi sa a".

Waheed Omar, yon pòtpawòl kanpay prezidan Karzai la, di li kwè eleksyon an fè pati dwa pèp afghan an.

"Retrè a se chwa pèsonèl Doktè Abdullah. Li pa dwe afekte tout pwosesis la". Pòtpawòl Nasyonzini nan Afghanistan an, Aleem Siddique, di Lavwad'lamerik desizyon Abdullah a se te yon desizyon difisil. Li felisite kandida a pou jan li konpòte li pandan tout kanpay la e li di se otorite afghan yo kounye a ki dwe detèmine pwochen etap la.

"Nou dwe rete tann pou 'n tande sa enstitisyon legal afghan yo gen pou di--Komisyon Elektoral Endepandan an ak Kousiprèm nan--pou yo pwononse yo sou pwochen etap yo".

Otorite elektoral afghan an di, dapre konstitisyon peyi a, pwosesis elektoral la dwe kontinye. Yon pòtpawòl Komisyon Elektoral la, Waheed Omar, di Lavwad'lamerik Abdullah kite dat limit pou l' te retire kò li nan konpetisyon an pase.


XS
SM
MD
LG