Accessibility links

Ayiti: Pati Politik Kont Konsèy Elektoral - Doleyans Asosyasyon Nasyonal  Jij yo Devan Ministè Lajistis - Anons Envestisman Kanadyen pou 500 Milyon Dola Ameriken 


Ann Ayiti, lidè yon kowalisyon ki fèk kreye, Konsèy Nasyonal Patriyòt Ayisyen yo (Le Conseil National des Patriotes Haitiens), deside wete delege yo te genyen nan Konsèy Elektoral Pwoviza a (KEP) apre yo te anonse kowalisyon sa a pap patisipe nan okenn eleksyon KEP a òganize. Youn nan lidè regwoupman politik la, avoka Osner Févry, deklare konsèy elektoral ki la jounen jodiya a pa gen kredibilite ni moral poltik ki nesesè pou l responsab òganizasyon pyès eleksyon. Konsa Konsèy Nasyonal Patriyòt Ayisyen yo mande yon chanjman total-kapital nan KEP a.

-----------------------------------------------------

Yon lòt kote, Asosyasyon Nasyonal Majistra Ayisyen yo (ANAMAH) -donk asosayson jij yo nan peyi Dayiti- lanse avèstisman pou di li pral pran kèk pozisyon byen dyanm kont otorite lajistis yo si depatman ministeryèl konsène a pa prese pran dispozisyon pou l peye manm li yo anviwon 2 zan aryere salè, sètadi lajan Leta pa peye yo depi 2 lane. ANAMAH lanse avètisman sa a 4 jou sèlman aprè rantre jidisyè a pou ane 2009-2010 la. Nan yon lèt manm asosyasyon an voye bay minis jistis ayisyen an, Jean Joseph Exumé, yo mande tou kreyasyon Konsèy Siperyè Pouvwa Jidisyè a, yon enstitisyon konstitisyon an prevwa e kap la pou l tabli yon reyèl ekilib ant 3 pouvwa yo, veye sou respè dwa sitawyen yo e sitou anpeche moun ki gen otorite abize otorite sa a. Anpil obsèvatè ak konesè nan domèn nan --tankou pwofesè Dwa Konstitisyonèl e lidè politik Myrlande Manigat, avèk espesyalis nan Ekonomi Politik, Jacques Jonassaint, fè Lavwadlamerik konnen Konsèy Siperyè Pouvwa Jidisyè a gen pou jwe yon wòl endispansab nan enstalasyon demokrasi nan peyi a; e san enstitisyon sa a, etablisman yon eta-de-dwa kabab tounen yon chemen long e difisil. Avèk konsèy sa a, menm yon senp sitwayen pòv kapab rele yon gran nèg nan tribinal si gran nèg sa a fè li abi; li menm kapab rele pi gwo otorite peyi a devan lajistis.

-----------------------------------------------------

Anfen, yon delegasyon òmdafè kanadyen ki ann Ayiti depi plis pase yon semèn, pran angajman pou l envesti yon afè de 500 milyon dola ameriken nan peyi a kòm retonbe gwo rankont ki te reyini semèn pase a nan Pòtoprens plis pase 150 antreprenè ak òmdafè etranje ou ki te sòti nan dyaspora a. Nap raple gwo rankont entènasyonal sa a te dewoule sou patwonaj La BID ak ansyen Prezidan ameriken Bill Clinton, anvwaye espesyal Nasyon Zini ann Ayiti. Youn nan antreprenè kandyen yo, Pascal Maciotra --ki te pale nan non tout delegasyon an-- presize li-menm ak konpatriyòt li yo enterese devlope sektè enèji a; e pou sa, yo pral travay pou yo transfòme dechè (fatra) an kouran elektrik pou yo vann ak gouvènman ayisyen an. Misye Maciotra lanse apèl bay otorite nan gouvènman Préval/Pierre-Louis a pou yo kreye kondisyon ak enfrastrikti ki nesesè pou reyalizasyon diferan pwojè envestisman kanadyen yo kapab lanse –san bliye le fèt ke pwojè sa yo pral mache ak kreyasyon travay.

Jdesmara@voanews.com

XS
SM
MD
LG