Accessibility links

Gwo Dife Pran nan Atèn, Kapital Lagrès: Plis Pase 10 Mil Moun kouri Kite Kay yo


Yon gwo kokenn chenn dife eklate nan yon katye rezidansyèl vil Atèn, an Grès, byen bonè yè maten e sa fòse otorite yo fè plis pase 10 mil moun kite kay yo nan yon bouk ki rele Agios Stefanos. Sapè-ponpye rekòmanse goumen pou wè si y a touye dife yo, avèk avyon ak elikoptè kap lage gwo bokit dlo sou flanm-dife yo kap gaye san rete.

Operasyon an rekòmanse jodi lendi a byen bonè anvan solèy leve, e gen plis pase 2 mil sapè-ponpye kap patisipe ladan n pou wè si y a sove kay ak vi ki menase yo. Otorite yo di gwo dife sa a kontinye gaye plis nan direksyon zòn kote moun ap viv, menm si li te fè yon ti bese pandan van yo te fè yon kalmi yè dimanch la; men van yo rekòmanse soufle byen fò jodiya e otorite yo atann yo aske yo kontinye soufle pandan tout jounen an. Harry Tszanis, ki nan ajans nouvèl Atèn nan, di Lavwadlamerik 2 zan apre malveyan te mete dife e koze lanmò 70 moun, fwa sa a ankò gen dwèt ki lonje sou malfèktè ki ta fè eksprè mete dife sa yo. Nap site misye Zszanis:

« Se pa yon dezas natirèl totalman. Nan yon grenn jou nou anrejistre 83 dife forè. Se moun kap limen dife sa yo ; yap pwofite gwo van ak sechrès ki gen nan zòn nan. »

Premye Minis Costas Karamanlis te konvoke yon reyinyon manm kabinè li a prese-prese yè maten pou otorite yo te panche yo sou sitiyasyon an. Jiskaprezan nouvèl yo pa rapòte moun ki ta viktim nan dife sa yo nan peyi Lagrès.


XS
SM
MD
LG