Accessibility links

Breaking News

Prezidan Kostarika a, Oscar Arias, Trape Grip A (H1N1) an


Pri Nobel Lapè e prezidan Kostarika a, Oscar Arias, anonse lap soufri ak viris A (H1N1) ki bay maladi grip pòsin nan. Anons sa a montre viris la, malgre relativman li pa touye twòp moun atravè lemond, pa respekte menm chèf deta e rete yon gwo sous kè-sote.

Prezidan Arias, 69 van, pibliye yon deklarasyon pou l' fè konnen li lakay li "an karantèn e lap resevwa tretman ak medikaman anti-grip Oseltamivir."

Misye Arias deklare "pandemi an pa fè diferans". "Mwen se yon lòt ka anplis nan peyi a, e map swiv rekòmandasyon otorite lasante yo preskri tout poplasyon an".

Lidè kostariken an soufri las (asthme) kidonk, lap fè fas ak plis risk konplikasyon ke lòt malad; men li te an sante ase pou'l kontinye aktivite chèf deta li jouk madi 11 out la.

Prezidan an di: "apa malèz lafyèv ak gòj fè mal, mwen anfòm e mwen genyen tout kapasite m' pou m' egzèse fonksyon mwen a distans."

Pri Nobel Lapè a ap soufri ak sentòm grip depi dimanch, men li te pran pa nan divès aktivite piblik jiska madi maten.

Aktyèlman, Arias ap jwe wòl medyatè nan kriz politik Honduras la, kote lame jete 28 jen dènye a prezidan Manuel Zelaya.

XS
SM
MD
LG