Accessibility links

Breaking News

20 Jiyè 1969 - 20 Jiyè 2009: Debakman Lòm Sou Lalin gen 40 tan.


Jodi lendi 20 jiyè 2009 la make 40èm. anivèsè debakman lòm sou lalin. Aparèy ki te mennen 2 ameriken (Neil Armstrong avèk Edwin "Buzz" Aldrin) sou satelit Planèt Tè a, sete Appolo 11. Nan okazyon anivèsè sa a, premye moun ki te mete pye sou lalin nan, astwonòt Neil Amstrong, pale yè dimanch la nan yon seremoni ki dewoule nan oditoryòm Mize Lespas la nan Washington, pou l rann omaj pou pyonye ki te patisipe nan kous pou lespas nan ane 50 e 60 yo; li di travay yo te reyalize se yon egzanp ki montre kijan sipè-puisans rival yo kapab fè konkirans nan lapè. Sitasyon:

" Sete yon konkirans pasifik total e dyanm: Lèzetazini kont Linyon Sovyetik. Sete yon konkirans solid ki te pèmèt 2 pati yo pran gran chemen lespas la avèk objektif pou yo fè etid ak eksplorasyon syantifik. Finalman sa te ofri nou yon mekanism ki debouche sou kowoperasyon ant 2 ansyen advèsè. E nan sans sa a, antwot, sete yon envestisman eksepsyonèl ki te vo lapèn pou tou lè 2 peyi yo.

Nan okazyon seremoni ki te dewoule nan Mize de Lespas la nan Washington, 2èm. moun ki te pile sifas lalin nan, Edwin « Buzz » Aldrin lanse apèl pou l mande pou Lèzetazini relanse pwogram espasyal li a e pran angajman pou l voye moun sou Planèt Mas. N ap site misye Aldrin :

"Etazini, eske ou toujou ap reve gwo rèv? Eske ou toujou kwè nan tèt ou? Eske ou pare pou w leve yon gwo defi nasyonal ? Mwen lanse apèl bay pwochèn jenerasyon an ak lidè politik nou yo pou yo reponn epi di: "Yes, we can", "wi, nou kapab."

Edwin Buzz Aldrin ki pale konsa a, te genyen okazyon pou l mete menm kesyon sa yo devan prezidan Barack Obama jodi lendi 20 jiyè a nan La Mezon Blanch, kote li menm avèk 2 lòt astwonòt Appolo 11 yo (Neil Armstrong avèk Michael Collins) fè yon rankont avèk lidè ameriken an.

NB: Ale sou ralonj ki anba liy sa a pou nou "mache" sou lalin nan e wè anplasman kote astwonot misyon Apollo 11 lan te aluni (alunir=poser) jou 20 jiyè 1969 la. http://www.google.com/moon/


XS
SM
MD
LG