Accessibility links

Breaking News

KONKAKAF Modifye Règleman Koup Dò a


KONKAKAF/ Foutbòl

Responsab yo nan KONKAKAF la fè konnen nenpòt seleksyon kap patisipe pandan yon menm ane nan koup Konfederasyon FIFA a ak koup dò KONKAKAF la kapab ogmante kantite jwè yo soti 23 pou rive a 30 jwè. Lòt seleksyon yo toujou limite a 18 jwè nan chak rankont.

Desizyon an vle di, Etazini kapab ajoute 7 lòt jwè pou Kou Dò a kap kòmanse Vandredi 3 Jiyè lè Kanada ap rankontre Jamayik epi Kosta Rika kont Salvadò nan Carson an Kalifòni nan group A a. Etazini ap jwe premye match li nan Seattle Samdi 4 Juyè kont Honduras epi Ayiti ap jwe kont la Grenad nan gwoup B a. Gwoup sa a gen pou vinn

Washington D C kote Etazini ap rankontre la Grenad epi Ayiti kont Honduras. Gwoup la pral nan Boston kote Ayiti ap rankontre Etazini epi Honduras kont la Grenad. Gwoup C a ap antre nan won 5 Juyè nan Oakland, Kalifòni kote Panama ap rankontre Gwadeloup epi Nikaragwa kont Meksik.

Responsab yo nan KONKAKAF la anonse klub nan zòn nan pap patisipe nan Koup Amerik du Sud la, 2zyèm pi gran konpetisyon foutbòl nan zòn nan apre Copa Libertadores de Amerika. Desizyon an pran prèske 2 mwa apre 2 klub Meksiken Chivas de Guadalajara ak San Luis te fòse abandone koup amerik du Sud la apre klub Sud Ameriken yo te refize al jwe O Meksik akoz pwoblèm grip H1N1 an.

Sekretè Jeneral KONKAKAF la Chuck Blazers di klub KONKAKAF yo ap patisipe nan chanpyona Copa Libertadores de America pou sezon 2010 la an atandan yo reyini an Novanm pou pwononse yo sou dosye a.

Foutbòl / Amerik du Sud

Nouvo antrenè klub Bolivyen Santa Fe Ruben Israel demisyone nan tèt klub la apre menas lanmò li di li resevwa. Responsab klub la di msye Israel retounen an Urugwe apre li resevwa 2 kout fil ki menase pou touye l si l mete sou ban defansè ekip la Francisco Najera.

Foutbòl / US Open

Nan koup US Open nan Wilmington , Hammerhead suprann Chikago fire ak yon viktwa 1 a 0 pou l kalifye nan kar de final chanpyona US Open nan ki reyuni klub amatè ak pwofesyonèl ameriken. DC United pase nan kar de final la gras ak yon swif li pase Ocean City Barons yon swif 2 a 0. Nan kar de final D C United pral rankontre Harrisburg City Islanders ki suprann New England Revolution.

Nan match amikal entènasyonal, Kanada vannen Gwatemala 3 a 0.

Foutbòl/ Eròp

Federasyon foutbòl Repiblik Tchèk la ap chache yon nouvo antrenè apre yo pran desizyon pou pa renouvle kontra antrenè Frantisek Straka. Federasyon an fè konnen, li espere nonmen yon nouvo antrenè disi semen pwochèn. Repiblik Tchèk gen pou jwe yon match amikal kont Bèljik 12 Out avan li rekòmanse kanpay eliminatwa Mondyal 2010 le 5 Septanb kont Slovaki. Repiblik Tchèk klase 4tryèm ak 8 pwen pou 6 rankont ---ki donk a 7 pwen dèyè lidè gwoup la Slovaki ki gen 15 pwen.

Angletè / Stad Olenpik

Stad prensipal je zolenpik yo nan vil Lond an 2012 kapab rete menm jan apre fen je zolenpik yo an 2012. Majistra vil la, Boris Johnson, espere stad la, ki gen yon kapasite 80 mil plas, kapab akeyi match koup du mond si Lond reyusi nan tantativ lap fè pou l akeyi koup du mond la an 2018 ou an 2022. Premye sitwayen vil la te supòte lide pou te redui kapasite stad la a 25 mil plas. Komite òganizatè a poko jwenn yon klub ki ta enterese pran kontwòl stad la ki koute 907 milyon dola. Jesyon stad la ap koute 18 milyon dola chak ane.

Foutbòl / Blatter

Prezidan FIFA a Sepp Blatter rekonèt gen anpil pwoblèm komite òganizatè koup du mond Afrik du Sud la dwe rezoud avan debu koup du mond la soti 11 Jwen pou rive 11 Juyè 2010. Pami pwoblèm yo nou jwen transpò pou jounalis yo, fanatik yo. Msye Blatter di li pap gen oken pwoblèm pou l bay Afrik du Sud 10 sou 10 si pwoblèm sa yo rezoud. Pou sa ki gen rapò ak koup Konfederasyon an msye Blatter eksprime satisfaksyon. Prezidan òganizasyon foutbòl entènasyonal estime a anviwon 450 mil touris ap vizite Afri du Sud pandan dewoulman koup du mond la plis 19 mil jounalis. Li enpòtan pou responsab yo rezoud pwoblèm lojman pou vizitè yo. Komite òganizatè a di gouvènman ap ajoute 1000 otobus pou redui pwoblèm transpò apre match yo

Baskètbòl/ US

Ekip baskètbòl , Detroit Pistons revoke antrenè Michael Curry apre yon sezon li pase nan klub la. Detroit fini sezon 2008 la ak 39 viktwa 43 defèt.

XS
SM
MD
LG