Accessibility links

Nouvèl sou Tiraj Osò Lig Chanpyon KONKAKAF la


Foutbòl/ KONKAKAF

Tiraj osò Lig chanpyon KONKAKAF la dewoule Jedi 11 Jwen an nan katye jeneral òganizasyon an nan vil New York. Klub Meksiken Cruz Azul ap rankontre klub Kosta Riken Herediano nan seri ale/retou premye tou a. Pachuka kapab rankontre swa klub Gwatemala Communicaciones ou byen Jalapa. Klub ameriken New York Redbulls ap rankontre klub Trinidadyen W Connection epi DC United fas a klub Salvadoryen Chalatenango.

Venkè seri ale/retou a pral jwen 8 lòt tèt de seri. Group A a ap gen ladann klub Ameriken Houston Dinamo ak klub Salvadoryen Metapan plus venkè seri ant Patchuka ak yon klub Gwatemala e venkè seri Olenpia ak yon klub Panameyen. Group B a klub Meksiken Toluca, klub Honduryen Marathon plis venkè seri DC United/ Chalatenango e venkè seri San Juan Jabloteh ak yon klub Panameyen.

Klub ameriken Colombus Crew, klub Kosta Riken Deportivo Saprissa trouve yo nan group C a ak venkè seri Cruz Azul/ Herediano epi venkè seri yon klub Kanadyen ak Puerto Riko Islanders. Group D a gen landan klub Meksiken Pumas, klub Gwatemala Communicaciones ou Municipal, venkè New York Redbulls/ W Connection epi venkè Liberia ou Real Espana.

Foutbòl / Afrik di Sid

Dimanch kap vini la a balon pral woule an Afrik di Sid nan okazyon koup konfederasyon an ki se yon mini koup du mond ant chanpyon 5 konferasyon manb FIFA yo plis chanpyon du mond la Itali, chanpyon Eropeyen an Espay ak òganizatè konpetisyon an Afrik di Sid. Se yon okazyon pou teste 4 stad kote koup du mond 2010 la pral dewoule.

8 peyi yo divize ant 2 group ki gen 4 seleksyon Irak, Afrik du Sud, Nouvel Zeland ak Espay nan group A a. Group B a gen ladann Etazini, Brezil, Itali ak Ejipt. 2 premye nan chak group ak kalifye pou semi final la kap jwe 24 e 25 Jwen. Venkè yo ap rankontre an final pou detèmine chanpyon koup Konfederasyon an menm jou ak match konsolasyon an ant 2 pèdan yo 28 Jwen. Afrik du Sud ap louvri konpetisyon an kont Irak answit Espay ap rankontre Nouvèl Zeland.

Foutbòl/ Etazini

Demen Samdi a nan okazyon 14 zièm jounen chanpyona lig balon an ameriken an DC United ap akeyi Chikago Fire. New York Redbulls pral lakay Toronto FC. Dallas ap akeyi Houston Dinamo. New England Revolution ap fè yon kout pye lakay Kansas City. Seattle ap akeyi San Jose epi Los Anjeles Galaksi pral amuze l lakay Real Salt Lake. Dimanch Chivas USA ap vizite Colombus Crew.

Baskètbòl/NBA

Los Anjeles Lakers bezwen yon lòt viktwa pou l ranpòte tit chanpyona nasyonal NBA a lè lap rankontre Orlando Majik Dimanch nan Orlando. Lakers yo te bezwen pwolongasyon pou kale Orlando Majik 99 a 91 Jedi 11 Jwen an. Lakers yo, kap domine seri a 3 viktwa kont 1 defèt, ranpòte rankont la gras ak Derek Fisher ki make 3 pwen 4 pwen 6 sekond avan fen tan regelmantè a.

Atletisme/Usain Bolt

Kourè Jamayiken Usain Bolt bat 2 ameriken pou l ranpòte kous 100 mèt Festival Excellence ki tap dewoule nan Toronto Kanada. Bolt kouvri distans la an 10 pwen 00 sekond devan Shawn Crawford ak Ivory Williams.

Foutbòl Inivèsitè Ameriken

Asosyasyon Nasyonal Atletik Inivèsitè yo(NCAA) mete inivèsite Alabama a ak 15 lòt enstitusyon sou yon period pwobatwa 3 zan akoz yon seri de vyolasyon nan pwogram spòtif yo. Asosyasyon an di 201 atlèt nan 16 disiplin spòtif resevwa yon seri de avantaj inapropriye nan pwogram bous detud inivèsite yo ofri tankou ofri yo liv gratis.

Tennis / Swèd

Federasyon Tenis Entènasyonal la redui sanksyon finansye li te enpoze sou la Swèd apre federasyon an te jwe match Koup Davis la kont Izrayèl san patisipasyon piblik la. Match Swedwa yo pèdu 3 a 2 devan Izrayèl. Olye de 25 mil dola, federasyon Swedwa a ap peye 5 mil dola plis yon lòt 15 mil dola amand ki tap reprezante resèt rankont la.

XS
SM
MD
LG