Accessibility links

Breaking News

Bill Clinton: Anvwaye Espesyal Nasyonzini Pou Ayiti


Responsab Òganizasyon Nasyonzini yo (ONU) fè konnen sekretè jeneral Ban Ki Moon gen entansyon nonmen ansyen prezidan ameriken Bill Clinton kòm anvwaye espesyal li pou Ayiti. ONU gen pou l fè yon anons ofisyèl sou kesyon an madi 19 me a.

Mesye Clinton ak Mesye Ban te ale Ayiti pandan mwa mas pase a, yon fason pou yo te resantre atansyon kominote entènasyonal la sou pwoblèm nasyon karibeyen an ap konfwonte jounen jodi a.

Sit entènèt jounal ameriken The Miami Herald, kap site mesye Clinton, di ansyen lidè ameriken konsidere envitasyon Nasyonzini an kòm yon onè e li aksepte wòl sekretè jeneral òganizasyon mondyal la ba li pou l tounen anvwaye espesyal ONU pou Ayiti.

Ayiti, se peyi pi pòv nan emisfè oksidantal, e lap goumen pou l reprann li apre 4 tanpèt ki te frape l' ane pase. Tanpèt sa yo te detwi lavi plizyè santèn moun epi elimine anviwon 15 pousan nan pwodiksyon ekonomik peyi a.

Nan mwa avril pase a, donatè entènasyonal yo te pran angajman pou dekese yon nouvo asistans fiansyè 324 milyon dola pou Ayiti pandan 2 zan kap vini yo. Apre konferans bayè de fon yo pou Ayiti, isit Washington, responsab Bank Entè-ameriken Devlopman an, BID, te anonse 41 milyon dola nan lajan sa a pral sèvi pou kore bidjè 2009 gouvènman ayisyen an.

Mwa pase a tou, madam ansyen prezidan Clinton, sekretè deta Lèzetazini Hillary Clinton te fè yon vizit an' Ayiti pou rankontre ak prezidan René Préval ansanm ak kèk lòt responsab gouvènman an pou diskute sou plizyè pwen enpòtan, pami yo : estabilite, sekirite ak asistans finansyè.

XS
SM
MD
LG