Accessibility links

Cleveland Cavaliers Elimine Detroit Pistons nan Faz Final  NBA a


Baskètbòl/ US

Cleveland Cavaliers kalifye pou pwochen tou faz final NBA apre elimine Detroit Pistons ak yon viktwa 99 a 78. Cavavaliers yo pral rankontre ak venkè seri ant Atlanta Hawks ak Miami Heat. Miami Heat ap domine seri 7 match la ak 2 viktwa kont 1 defèt. 2 ekip yo ap rankontre aswè a. Chikago Bulls te bezwen 2 pwolongasyon pou l kale Boston Celtics 121 a 118. Viktwa a pèmèt Bulls yo egalize seri 7 match ak 2 viktwa patou. 5 kièm rankont la fikse pou demen Madi a nan Boston. Orlando Majik te fè anpil efò avan li kale Philadelphia 76ers 84 a 81 pou mete seri a ak 2 viktwa chak kote. 2 ekip yo ap rankontre demen Madi a nan Orlando.

Nan konferans de Lwès la Houston Rockets suprann Portland Trail Blazers ak yon viktwa de justès 89 a 88 pou mete seri ak 3 viktwa kont 1 defèt. 5 kièm rankont la fikse pou demen Madi a.

Foutbòl/ KONKAKAF U-17

Kosta Rika, Etazini, Ondiras ak Meksik kalifye pou semi final eliminatwa koup du mond U-17 la kap dewoule O Meksik. Nan semi final la ki fikse pou Mèkredi—Meksik ap rankontre Ondiras epi Etazini fas a Kosta Rika. Trinidad and Tobago retounen lakay li ak 3 defèt e ankese yon total 13 gòl kont zero.

Kavali de Leogane elimine nan eliminatwa Lig Chanpyon a KONKAKAF la zòn Karayib la apre viktwa 1 a 0 klub Trinidadyen W Connection ranpòte an deplasman. Tanpète de Sen Mak ap jwe match retou a Vandredi Premye Me kont klub Antigua e Barbuda Green Bay Hoppers. Match ale a te fini 4 a 0 an favè klub Sen Makwa a.

Foutbòl / Etazini

DC United suprann New York Red Bulls ak yon viktwa 3 a 2 nan yon match ki te mete fas a fas 2 advèsè nan konferans de Lès la.

Foutbòl / Angletè

Lig foutbòl pwofesyonèl Angle a vote veteran klub Manchester United Ryan Giggs kòm foutbolè pou ane a. Giggs espere jwe 800 tièm rankont li pou Machester United nan okazyon match semi final ale lig chanpyon Eropeyen an kont Arsenal Mèkredi.

Giggs ap jwe nan Manchester United depi 1991.

Tenis

Itali kale la Rusi 4 a 1 nan semi final koup konfederasyon tenis la. Etazini remonte yon defisi pou la kale Repiblik Tchèk 3 a 2. Itali ap akeyi Etazini nan final la ki fikse 7 e 8 Novanm.

Espayòl Rafael Nadal kale konpatriòt li David Ferrer 6-2,7-5 pou l ranpòte pou yon 5 kièm fwa tounwa tenis Open Barselòn nan.

Natasyon

Najè franse Frederick Bousquet bat yon rekò du mond nan konpetisyon natasyon 50 mèt naj lib ki tap dewoule nan Montperllier.

XS
SM
MD
LG