Accessibility links

Breaking News

Manchester United Ak Porto Fè Match Nil 2-2 Nan Tounwa Lig Chanpyon Ewopeyen an.


Manchester United dekwoche yon match nil 2 a 2 devan FC Porto, yon ekip Portugal, nan match kar de final "aller" tounwa Lig Chanpyon ewopeyen an. Match la tap dewoule lakay Manchester, an n' Angletè.

An 2 mo 3 pawòl, Porto reyisi yon bèl eksplwa: kenbe chanpyon an tit la an'n echèk sou pwòp teren li. Rezilta sa a, avrè di, mete Manchester United nan yon pozisyon ase delika paske li oblije ranpòte match retou a nan Portugal si li dwe konsève chans li pou l' dekwoche yon lòt twofe. Jou madi apre midi 7 avril la sanble pat bon non plis tou pou yon lòt seleksyon anglèz, nap pale Arsenal ki manke fè bèk-atè devan Villareal. Skò: 1 a 1. Match nil an deplasman sa a bon Arsenal, men gen risk pou match retou a difisil pou li paske l' ka pa ka konte sou 2 nan jwè li yo: Gallas ak Almunia, gadyen li an, ki blese.

Jwè ki make gòl yo se Marcos Senna pou Villareal ki lage yon manman-pinba 25 mèt nan filè Arsenal (10èm minit de jeu) ak Adebayor ki egalize pou Arsenal (65 èm minit) gras ak yon ti bijou gòl ki merite antre dirèk-dirèk nan antoloji bèl gòl jwèt foutbòl la.

Jodi mèkredi 8 avril la, fanatik foutbòl yo pral gen okazyon wè ou koute 2 gwo match: premye a ant 2 towo angle (2 gran ekip) Liverpool FC ak Chelsea. E lòt la, ant Bayern Munich ki pral tope kòn li ak FC Barcelone gran favori konpetisyon an. Match sa a, se pral yon okazyon tou pou moun asiste yon dyèl ant 2 gran jwe franse kap evolye yo chak nan youn nan 2 ekip yo. Nap pale de Franck Ribéry ak Thierry Henry.

Kilès ki pral remèt pi bèl pèfòmans sou teren an? Repons, mèkredi apre midi a sou Lavwad'lamerik nan paj spò a.

XS
SM
MD
LG