Accessibility links

Prezidan Obama Sòti Satisfè nan Somè l'OTAN an ki Fini Samdi nan Strasbourg, an Frans 


Prezidan ameriken an, Barack Obama --ki patisipe nan somè l’OTAN nan vil Strasbourg, an Frans e nan vil Baben-Baden ann Almay, sòti vandredi 3 pou rive samdi 4 avril la-- fè konnen rankont sa a pote yon apui fò e global pou estrateji tou nèf Lèzetazini anonse pou politik li konsènan Afganistan. Nan yon konferans pou laprès misye Obama bay nan Strasbourg nan fen somè a samdi 4 avril 2009 la, li di lagè Afganistan an pa kapab reprezante yon konba pou Lèzetazini sèlman; e l’OTAN ap bay konkou, resous materyèl e imen ki nesesè pou l reyalize objektif li genyen pou Afganistan. Sepandan, daprè lidè ameriken an, plis resous nesesè pou manm Alyans la ranpòte laviktwa sou rebèl taliban yo. Misye Obama di -nap site:

"Nou pral bezwen plis resous ak yon efò pi soutni pou n reyalize objektif final nou yo. Men, angajman lòt manm l’OTAN yo pran la a pou yo bay plis sòlda, plis fòmatè ak plis sivil, se yon bon jan avans pou avni misyon nou nan Afganistan e pou anvi l’OTAN li menm."

Aprè somè a, Prezidan Obama tanmen yon toune nan kèk peyi ki kòmanse avèk yon vizit nan Repiblik Tchèk la. Youn nan objektif somè l'OTAN an sete make 60èm. anivèsè fondasyon Alyans Atlantik la.

Yon lòt kote, lidè 28 peyi manm l’OTAN yo nonmen premye minis peyi Dànmak la, Anders Fogh Rasmussen, kòm nouvo sekretè jeneral alyans la e yo tout mete yo dakò pou yo adopte yon politik tou nèf vizavi peyi Afganistan. Anfen, manifestan anti-LOTAN tonbe nan lese-frape ak lapolis anti-emet atravè vil Strasbourg kote yo mete dife nan yon otèl, yon ponp gazolin ak yon pòs polis. Lapolis te oblije sèvi ak gaz lakrimojèn pou yo gaye manifestan yo, nan moman gwo lafimen dife t ap sòti nan enstalasyon yo boule yo. Gen nan manifestan yo ki t ap mande yon fen nan tout lagè, tandiske kèk lòt tap reklame abolisyon l’OTAN kareman.

XS
SM
MD
LG