Accessibility links

Breaking News

Bank Santral peyi Dayiti anonse yon bès 10% nan lajan transfè diaspora ayisyèn nan


Ekonomi ayisyèn nan kòmanse santi konsekans resesyon an, sètadi ralantisman eknomik la Ozetazuni. Dènye rapò Bank Santral la ann Ayiti pibliye pou mwad fevriye a montre yon bès 10 pousan nan lajan tranfè ayisyen ki nan dyaspora a voye nan peyi a.

Asosiyason Pwofesyonèl Bank yo nan peyi Dayiti, APB, ki reyaji nan non sektè bankè a, fè konnen bès nan lajan tranfè yo pral gen yon efè konsiderab sou ekonomi ayisyèn nan. Prezidan APB a, Maxime Charles, deklare: "Lè ou konte transfè ant 100 ou 120 milyon dola ameriken pa mwa, yon bès 10 pousan ba ou an mwayèn 10 milyon dola.»

Inyon Europ la, bò kote pa l, pa rete endiferan. Reprezantan Komisyon Europeyèn nan nan Pòtoprens, Francesco Gosseti, deklare :« Ranlatisman ekonomi amerikèn nan ki pwovoke anpil revokasyon Osetazini riske gen gwo konsekans sou kapasite diaspora ayiysèn nan pou l voye lajan an Ayiti. Peyi devlope yo dwe elabore yon plan mondyal pou soutni ti peyi ki viktim kriz ekonomik la. »

Done ki soti nan Bank Santral peyi Dayiti a vin konfime yon rapò Bank Entè Amerikèn Devlopman, BID, sot pibliye e ki prevwa yon bès nan lajan transfè diaspora a ap voye nan rejyon Amerik Latin nan ak Karayb la. Dènye chif ki disponib sou sit entènèt BID la pou mwad janvye a montre lajan transfè kap sòti Ozetazini anrejistre yon bès 13 pousan.

Sepandan, prezidan BID la, Alberto Moreno deklare: "Li twò bonè pou n prevwa si volim transfè yo pral kontinye bese pandan ane a." Prezidan APB-a, Maxime Charles, ale nan menm sans ak Mesye Moreno. Sepandan reprezantan 2 enstitisyon sa yo di yap swiv tandans mouvman tranfè yo avèk anpil atansyon.

Pou w koute repòtaj sou dosye sa a, klike sou lyen anlè a, adwat.

XS
SM
MD
LG