Accessibility links

David Beckham Vle Abandone L A Galaxi


Foutbòl/ Eròp

Avoka David Beckham-yo twouve-yo an kontak ak responsab football Los Anjeles Galaksi yo sou posibilite pou footbalè entènasyonal Angle sa-a ta kontinye jwe nan Milan AC pandan sezon an. Galaksi di li vle pou Bekham retounen avan ouvètu sezon MLS la. Beckham fè konnen li prè pou l abandone kontra 5 kan li te siyen ak Los Anjeles Galaksi pou l reyalize rèv li pou l retounen jwe football an Eròp.

Kapitèn klub football angle Liverpool ap rate 3 semen aktivite apre li pran yon zòbòy nan pye goch li yè swa nan defèt Liverpool subi devan Everton. Blesu a vle di Gerrard ap rate match amikal Angletè gen pou jwe kont Espay Mèkredi pwochen nan Seville. Gen posibilite pou Gerrard rate match ale Lig chanpyon Liverpool gen pou jwe kont Real Madrid 25 Fevriye.

Foutbòl/ Ayiti

Klub Sent Loui ap monte nan chanpyona premyè divizyon ayisyen an apre viktwa li ranpòte yè Mèkredi a nan 2 zièm divizyon. Racing Klub ayisyen poko kalifye apre match nul li fè yè Mèkredi a. Racinis yo bezwen yon viktwa ak konkou lòt klub pou l monte nan premyè divizyon.

Foutbòl/ KONKAKAF

11 Fevriye kap vini la a pou rejyon KONKAKAF-la, kote 11 nasyonal Meksik-la pral rankontre ak selekyon nasyonal Lèzetazuni-an nan eta Ohio. Kosta Rika ap akeyi Honduras menm jou-a, epi Trinidad e Tobago pral fè deplasman-an lakay Salvador. 3 premye nan group la ap kalifye pou faz final mondyal la; e peyi kap klase 4 trièm-nan va genyen pou jwe yon match de baraj ak peyi ki klase 5 kièm nan rejyon Amerik du Sud la.

Nan menm jounen an (swa nan dat 11 fevriye-a), Ayiti ap jwe yon match amikal avèk seleksyon nasyonal Kolonbi-a. Carlo Marcelin, manb staf teknik seleksyon bikolor-la, di nou kèk pami jwè seleksyone ayisyen-yo ap evolye sou kontinan Erwopeyen-an e nan rejyon Amerik yo.

Etazuni anonse rankont li pral fè ak Trinidad /Tobago-a pral dewoule nan vil Nashville, nan eta Tennessee, le premye Avril apre seleksyon etwale-a va finn rankontre Salvador nan vil San Salvador, nan dat 28 Mas.

Toujou nouvèl sou zòn KONKAKAF-la :Panama ranpòte koup dè Nasyon Amerik Santral-la gras ak yon viktwa supriz 5 a 3 li ranpòte sou seleksyon nasyonal Kosta Rika sou tir de penalite. Nikaragwa kale Gwatemala 2 a 0 pou l jwenn 5 kièm plas nan Koup dò KONKAKAF 2009 la.

Lis konplè peyi kap patisipe nan faz eliminatwa final-la pou rejyon Amerik du Nò/Amerik Santral ak Karayib-la –ou KONKAKAF.

Pou Amerik du Nò a, nou gen Etazuni, Meksik, ak òganizatè konpetisyon-an Kanada. Nan rejyon Karayib la : Nou jwen Jamayik, Kuba, la Grenad ak Gwadeloup. 5 peyi ap reprezante Amerik Santral la : Se Panama, Kosta Rika, Salvador, Honduras ak Nikaragwa.

Yon lòt kote : nan kad konpetisyon pou final eliminatwa koup du mond U-17 la kap kòmanse 21 Avril o Meksik, Nou jwenn sou pwogram rankont-yo : Honduras-Kanada, Kuba kont Etazuni pou 2 match douvètu-yo. 4 premye yo ap kalifye pou faz final koup du mond la kap dewoule nan Nijerya ane sa a.

Foutbòl/ Afrik

Stad Pretorya a an Afrik du Sud se premye sou yon total 10 stad ki pare pou koup du mond 2010-la. Samdi kap vini la a, Stad Pretorya a ap akeyi yon rankont lig football premye divizyon peyi a. Kapasite stad la se anviwon 50 mil plas.

Foutbòl / Azi

Ansyen antrenè seleksyon nasyonal Irak la, Adnan Hamad jwenn nominasyon-n kòm nouvo antrenè seleksyon Jordani a ; objektif otorite Federasyon Football jòdanyen-an fiske pou li, se pou l ede seleksyon-an jwenn kalifikasyon-n pou je Azyatik yo ki fikse pou ane 2011 e ki gen pou dewoule nan emira Katar.

Foutbòl/ FIFA

FIFA kontan deske gen 13 peyi ki kandida pou òganize koup du mond 2018 ak 2022 a apre Ejipt finn retire kandidatu-l a la dènye minit. Peyi ki sou lis-la se : Ostrali, Beljik, la Oland, Angletè, Endonezi, Japon, Kore du Sud, Meksik, Katar, la Rusi, Espay ak Etazuni. Pwochen etap la fikse pou 16 Fevriye lè FIFA ap voye yon fòmulè enskripsyon bay 13 kandida yo. Patisipan yo gen juska 16 Mars pou yo konfime kandidatu-yo.

Tenis

Anfen, nan tennis : Defèt an 5 manch Swis Roger Federer sot subi devan espayòl Rafael Nadal nan final Open Ostralyen an montre enpòtans defi ki devan ansyen numewo 1 mondyal la pou l ranpòte yon 14 zièm tit Gran Shelem. Rèv Federer kounye a se ranpòte yon lòt tit kap pèmèt li egalize kantite tit ameriken Pete Sampras te ranpòte nan karyè l-- ak posibilite pou l ta menm depase chif sa-a. Nadal ranpòte 5 final Gran Shelem fas ak Roger Federer sou yon total 7 final gran chelem 2 jwè-yo diskute.

E bò kote medam-yo : Serena Williams, nouvo numewo 1 tenis mondyal feminen an, enskri pou l patisipe nan Lig pwofesyonèl Tenis Mondyal la ki fikse pou sezon été a. Tounwa a gen pou l dewoule soti 2 pou rive 26 Juyè ane 2009 la.

Ciklisme

Siklis Bèlj Frederiek Nolf mouri nan chanm otèl li nan vil Doha Katar kote lap patisipe nan Tour Katar la. Otorite yo di siklis la mouri pandan li tap dòmi. Ekip siklis la abandone konpetisyon an e retounen nan Bèljik.

Basebòl/ Dopaj

Yon juj federal ameriken nan San Francisco revele plizyè paj dokuman yon tribunal nan ankèt kap menen kont jwè baseball ameriken Barry Bonds ki ta bay manti sou sèman kòm kwa li pa ta konsome dròg. Avoka Barry Bonds mande juj la pou l rejte pifò chèf dakuzasyon yo.

Dokuman an gen ladann tès dopaj pozitif, kalandriye aktivite yo, transkrip konvèvasyon telefonik ant Bond antrenè pèsonèl li Greg Anderson ak Steve Hoskins. Bond ki gen pou l prezante devan tribunal jodi a, kapab plede non koupab sou chèf dakuzasyon kòm kwa li bay manti epi li kouche an kwa kont la justis. Juj la ap gen pou l deside si wi ou non lap rejte kèk prèv komisè gouvènman an te ranmase pou jujman an kap kòmanse 2 Mas.

Baskètbòl/ NBA

Pou yon 2 zièm fwa Lebron James make 50 pwen nan Madison Square Garden nan okazyon viktwa Cleveland Cavaliers ranpòte kont New York Knicks 107 a 102. 52 pwen James make a pèmèt li rejwen Michael Jordan kòm 2 basketè ki make 50 pwen pou pipiti nan Madison Square Garden nan.

Lebron James fini rankont ak 11 pas ki make pwen epi trape balon an 10 fwa pou tounen premye basket depi Kareem Abdul-Jabbar te make yon triple an 1975 nan yon rankont kote li make 50 pwen.

Kobe Bryant ki sot make 61 pwen nan Madison Square Garden Lendi pase, make 36 pwen nan viktwa 115 a 107 Lakers yo ranpòte devan Toronto Raptors. Washington Wizards subi yon lòt defèt-fwa sa a devan New Jersey Nets ki pilon-nen yo 115 a 88.

XS
SM
MD
LG