Accessibility links

Breaking News

Izrayèl Avèti: Ofansiv Gaza a Ka Dire Lontan


Yon seri atak lame izrayelyèn lanse kont militan Hamas yo nan Gaza rive sou twazyèm jou, ak yon bilan ki deja nan omwen 310 mò pami Palestinyen yo. Otorite palestinyen fè konnen, pou pi piti gen 180 militan Hamas ki pèdi lavi yo. Yon ajans L’ONU rapòte gen omwen 51 sivil ke li konfime ki mouri, dapre sous medikal nan Gaza.

Sous palestinyen di gen plis pase 900 blese apre 2 premye jounen ofansiv lame izrayelyèn nan. Temwen sou plas fè konnen avyon-de-gè izrayelyen detwi lokal ministè enteryè Hamas ap dirije nan vil Gaza a e yo lage bonm pandan omwen 5 fwa sou Inivèsite Islamik la, ki se yon baz pou militan Hamas. Ofansiv sa a se yon reprezay pou plizyè wokèt Palestinyen yo nan Gaza lanse sou Izrayèl nan jou ki sot’ pase yo.

Yè dimanch la, omwen yon misil Hamas sot’ tonbe toupre vil Ashdod, sou yon distans anviwon 30 kilomèt o nò Gaza. Maten an, majistra vil Ashkelon, nan sid Izrayèl, deklare gen yon Izrayelyen ki mouri ak 8 lòt ki blese nan atak-ak-wokèt ki soti Gaza. Premye-Minis Ehud Olmert avèti ke operasyon ki tanmen samdi a ka dire lontan. Sepandan, Minis Afè Etranjè Tzipi Livni deklare: Izrayèl pa gen entansyon re-okipe teritwa a ke li te abandone an 2005 apre 38 an okipasyon militè.

XS
SM
MD
LG