Accessibility links

Breaking News

Atak Teworis Nan Mumbai, Peyi End; Bilan Pwovizwa: 101 Moun Mouri


Lapolis nan Mumbai (ansyènman vil Bombay) fè konnen omwen 101 moun pèdi lavi yo e 300 lòt blese nan plizyè atak teworis ki fèt pasi-pala nan kapital finansyè End lan. Dapre sous polisye yo, plizyè ajan polis ak responsab anti-teworis vil Mumbai la, Hemant Karkare, pami moun ki mouri nan atak la. Nan kòmansman jounen jedi 27 novanm nan--lè lokal nan peyi End--enkoni ak zam atake plizyè sektè alafwa nan Mumbai--pami yo 2 lopital. Polisye endyen yo presize bandi yo, nan sa ki sanble yon operasyon byen monte, utilize mitrayèt ak grenad omwen 10 kote diferan. Atak yo te vize 2 estasyon tren ak 2 otèl plizyè etaj:otèl The Taj Mahal Palace and Towers ak otèl Oberoi, plis yon restoran.

Otorite yo di bandi ame yo barikade tèt yo andedan otèl Oberoi, kote sanble yo kenbe plizyè sitwayen oksidantal kòm otaj. Douvan-jou jedi 27 novanm nan kòmando militè antre nan Taj Hotel pou eseye deloje ou elimine teworis yo. Temwen di yo wè lafimen kap sòti nan fetay otèl la, men ponpye rive mete dife a sou kontwòl. Sepandan, menm sous yo endike batiman istorik la sibi gwo dega.

Antretan, fòs sekirite endyen yo anbake nan yon fas a fas ak nèg ame ki pran kontwòl otèl Oberoi a, kote yo sanble kenbe yon bon valè moun an'n otaj. Lapolis endike tou ke yo touye 4 sispèk e arete 9 lòt. Men pèson pa konnen nan ki sikonstans devlopman sa yo rive. Pèson pa konnen non plis motif atak la. Medya lokal yo fè konnen yon gwoup militan (peu connu) ki rele Deccan Mujahideen, revandike responsabilite atak yo. Sepandan, nouvèl la di yo pa kwè sous sa a se yon sous yo ka fè konfyans.

XS
SM
MD
LG