Accessibility links

Breaking News

Prezidan-Eli Barack Obama Ap Pare Kabinè li


Etazini-Politik: Prezidan-eli Barack Obama reyini ak fanmi li nan Chicago, kote l'ap prepare ekip ki pral travay avèk li lè li va ranplase Prezidan Bush nan palè a, 20 janvye kap vini an. Men 2 jou apre kokenn viktwa Senatè Obama sou rival repibliken n nan John McCain, espesyalis politik ak ekspè nan relasyon entènasyonal yo fè konnen prezidan eli a pral gen pou l fè fas ak divès defi depi okòmansman.

Youn nan pwoblèm klè kap tann ni, se, san di pètèt, dosye prezidan sòtan an, George W. Bush, pral kite dèyè pou li. Pami dosye sa yo, genyen yon kriz ekonomik grav, 2 gè (youn nan Irak e lòt la nan Afganistan), posiblite pou Iran fabrike zam nikleyè, epi yon seri de lòt pwoblèm ki merite pou nouvo lidè ameriken an panche l sou yo imedyatman.

Earl Black, yon pwofesè kap anseye nan Inivèsite Rice, di byen souvan tout nouvo prezidan ameriken genyen pou l fè fas ak pwoblèm ke predesesè l la kite dèyè. Pwofesè Black di: “Prezidan-an pral genyen pou l fè fas, pa egzanp, ak pwoblèm Ronald Reagan te gen devan n lè l te tounen prezidan an janvye 1981. Prezidan Obama pral eritye tout pwoblèm gouvènman Bush la tap konfwonte.

Daprè pwofesè Earl Black toujou, yon lòt pwoblèm ki poze pou nouvo prezidan-eli Etazini an, se gwo nivo esperans li mete nan lespri moun ki te apiye l yo.

Si ou vle koute yon repòtaj sou preparatif Barack Obama ap fè pou tranzisyon an, fè klik sou ralonj ki anlè atik sa a.

XS
SM
MD
LG