Accessibility links

Breaking News

Eleksyon Barack Obama: Reyaksyon Peyi Amerik Latin yo


Lidè latino-ameriken yo voye felisitasyon bay prezidan eli Barack Obama pou viktwa li nan eleksyon 4 novanm yo Ozetazini. Lidè rejyonal yo espere nouvo prezidan an pral resantre atansyon li sou Amerik Latin nan.

Apre eleksyon li nan fen ane 2000 la, prezidan George Bush te pwomèt yon nouvo apwòch nan angajman Lèzetazini nan Amerik Latin nan. Anpil lidè nan rejyon an, sepandan, te desi wè pwomès sa a pa reyalize, akòz lagè Irak ak Afghanistan an ki vinn detounen atansyon Washington. Kè sote sou ekonomi an sipoze domine kalandriye travay prezidan eli Barack Obama lè li antre nan palè a nan mwa janvye a.

Men dirijan latino ameriken yo espere nouvo prezidan an pral travay avèk yo nan lavni pou regle kesyon komès, sekirite ak kesyon sosyal yo.

Felipe Calderon, prezidan Meksik la, youn nan patnè komès Etazini, voye felisitasyon pou msye Obama e envitel'vinn vizite peyi Meksik. Nan peyi Chili, prezidant Michele Bachelet di Mr. Obama ap rive sou pouvwa a nan yon moman kote lidè nan rejyon an ap chèche nouvo solisyon pou pwoblem ya’p konfwonte. Madam Bachelet deklare "Chili ak Lèzetazini pataje menm kè sote, tankou nesesite pou jistis sosyal, plis egalite ak espwa chanjman nan lavni."

Nan Kolonbi, prezidan Alvaro Uribe di li espere travay etwatman ak prezidan demokrat la pou reyalize objektif yo komen yo. Gouvènman kolonbyen an tap travay ak prezidan Bush e ak lidè repibliken yo pou Kongrè a adopte yon akò komès lib, ke anpil demokrat pa apwouve. Msye Obama di li vle jete yon kout je sou akò a pou asire ke li genyen ladan plis pwoteksyon pou lidè sendikal yo, anvan Etazini adopte l' kòm lwa. Pou dirjan gochis nan rejyon an, eleksyon msye Obama make yon divòs ak politik gouvènman repibliken prezidan Bush la.

Genyen tansyon nan relasyon Washington ak La Paz (peyi Bolivie) kote prezidan Evo Morales akize msye Bush deske lap chèche foure bouchli nan afè gouvènman bolivyen an. Lidè bolivyen an deklare nouvo prezidan ameriken an ka ede redui mezantant ant 2 nasyon yo. Morales di "li espere msye Obama va leve anbago ekonomik Lèzetazini mete sou Kiba a e retire twoup ameriken nan sèten peyi". Li ajoute li genyen konfyans relasyon ant Washington ak La Paz pral amelyore.

Pandan kanpay elektoral la, kandida Obama te deklare li pral revize politik “bout di” Washington vizavi Kiba a, espesyalman limitasyon gouvènman Bush la te mete sou kantite lajan kiben kap viv Ozetazini kapab voye nan Kiba e sou vwayaj sitwayen ameriken nan zile a. Nan Kiba, anpil kiben ak sila kap viv Ozetazuni di yo apiye fason modere msye Obama vle abode kesyon kiben an.

Nan Brezil, prezidan Luiz Inacio Da Silva (Lula) lanse apèl pou mande Etazini leve anbago a sou Kiba. Li ajoute eleksyon yon Afriken-Ameriken kòm prezidan ta dwe pote fyète ak espwa nan peyi tankou Brezil, kote anpil sitwayen genyen zansèt afriken.

Prezidan venezuelyen an, Hugo Chavez pibliye yon deklarasyon kote li di eleksyon amerikèn yo montre «chanjman kap fèt nan rejyon Amerik Di Sid la ka petèt fèt tou Ozetazini. Li ajoute moman an rive pou 2 peyi yo tabli nouvo relasyon, relasyon ki pral chita sou bon jan kooperasyon ak respè souverènte peyi yo.
XS
SM
MD
LG