Accessibility links

Chanm Depite Ameriken an Rejte Plan Sovtaj 700 milya Dola Gouvènman Bush la


Chanm dè reprezantan ameriken an rejte pa 228 vwa pou e 205 kont yon lwa tou 2 pati yo tap apiye e ki vize otorize yon plan 700 milya dola pou ede mache finansye yo isit Ozetazuni. Opozan plan sila a konsidere l’ kòm yon entèvansyon masiv gouvènman ameriken an ki pa abòde veritab pwoblèm mache a pa lefèt ke l’ pa vini ak seri pwoteksyon ki nesesè pou pwoteje kontribyab ameriken yo.

Palmantè demokrat eta Massachussetts Barney Frank, ki se prezidan komisyon sèvis finansye nan chanm bass la ap reyaji sou rezulta vòt la.

/// ACT. FRANK ///

Nou regrèt deske nou la a, nou regrèt anpil pou n’ konstate kondisyon ekonomik peyi a ki rann desizyon sa a nesesè. Pa gen moun ki kontan wè echèk nap konstate nan sistèm ekonomik nou an.

/// FEN ACT. ///

Anpil palmantè republiken, bò kote pa yo, konsidere plan 700 milya dola gouvènman Bush la pwopoze a kòm yon sèvis byennèt pou gwo konpayi ameriken yo. Yo kwè mezi a pa pral pote rezulta pozitif yo swete sou mache finansye a e, anplis de sa, li pral lage plis dèt sou do pèp ameriken an a lon tèm. Palmantè republiken Jeb Hensarling, se youn ladan yo :

/// ACT. Hensarling ///

Mwen sispèk lwa sa a chaje ak konsekans moun pa ka prevwa, mwen sispèk bout pou bout li pa pral bay rezulta pozitif, mwen sispèk ke mezi a plis reprezante yon plan sovtaj ke youn plan ki pral fonksyone kòmsadwa. Mwen sispèk kontribuyab yo byen kapab eritye pi gwo dèt yo janm genyen kap peze sou do yo.

/// FEN ACT ///

OUTRO: Lefèt ke chanm bass la rejte lwa sa a lage dout sou avni plan sovtaj la, nan moman sena Lèzétazuni an tap pare pou’l pase alaksyon si chanm dè reprezantan an te apwouve plan an jodi lendi a.

XS
SM
MD
LG