Accessibility links

Breaking News

Konvansyon Nasyonal Pati Demokrat la Tanmen Nan Denver


Konvansyon Pati Demokrat ameriken an demare ofisyèlman lendi 25 out 2008 la nan vil Denver, eta Colorado, kote senatè Barack Obama pral aksepte--jedi-- nominasyon pati a pou eleksyon prezidansyèl novanm yo.

Delege ki soti nan plizyè eta ameriken ak senpatizan pati Demokrat la trouve yo nan Denver pou 4 jou. Se pou lapremyè fwa nan istwa eleksyon prezidansyèl ameriken yo ke yon nwa ap reprezante youn nan 2 pi gran pati politik yo, nan eleksyon prezidansyèl novanm yo. Sauveur Pierre Etienne yon politològ ayisyen kap viv nan Montreal Kanada di nou prezans Obama kòm kandida pati Demokrat la kapab chanje opinyon moun ki kwè Etazini se yon peyi rasis.

Pami moun kap gen pou pran la pawòl pandan 4 jou Konvansyon an nou jwenn Michelle Obama, madanm kandida a; Senatè Hillary Clinton, advèsè Obama pandan kanpay pou nominasyon pati a; ansyen prezidan Bill Clinton; ak oratè prensipal konvansyon an, ansyen Gouvènè ta Vijini e kandida pou Sena a Mark Warner.

Konvansyon an ap fini Jedi lè Senatè Obama va fin pwononse diskou pou l aksepte ofisyèlman nominasyon pati demokrat la an prezans plis pase 70 mil moun kap reyini nan stad football Denver Brocos la.

Pou w koute ti koze Doktè Pierre-Etienne fè ak Jean Robert Philippe la, fè klik sou ralonj ki anlè atik la.

XS
SM
MD
LG