Washington deklare si Venezuela patisipe nan lit kont dwòg la, sa t'ap redui sou kantite pwodui nakotik kap sòti nan peyi sa a e ki pase pa Ayiti ak Repiblik Dominkèn avan yo antre Ozetazini. Asistan-sekretè deta ameriken pou afè emisfè oksidantal la, Thomas Shannon, fè deklarasyon sa a jedi devan sou-komite afè emisfèrik yo la nan Chanm Reprezantan Etazini an. Msye Shannon deklare Lèzetazini aksepte òf Venezuela fè pou 2 peyi yo amelyore kooperasyon yo nan lit kont pwodui nakotik yo.
Deklarasyon sa a tonbe apre prezidan venezuelyen-an, Hugo Chavez, ofri pou l’ kolabore avèk Lèzetazini nan lagè kont dwòg la. Msye Shannon siyale Ayiti ak Repiblik Domikèn resevwa pifò dwòg ti avyon klandesten ap transpòte sòt Venezuela e ki pran direksyon Etazini, Ewòp ak rejyon Afrik de lwès la kote trafik dwòg la kreye enstabilite.