Accessibility links

Itali ap Chache yon Nouvo Antrenè


Football/Itali

Federasyon Football Italyen an revoke antrenè seleksyon nasyonal la Roberto Donadoni apre seleksyon elimine nan kar de final koup DEròp la devan Espay. Jus avan konpetisyon an Donadoni te pwolonje kontra l pou 2 zan jusk nan koup du mond Afrik du Sud 2010 la men kontra a te kondisyone sèlman si Italyen yo te rive nan semi final koup dEròp la. Pami antrenè posib yo nou jwen Marcello Lippi ki te demisyone apre li te ede Italyen yo ranpòte koup du mond Almay 2006 la.

Football/ Euròp

Dènye semi final koup dEròp la ap dewoule jodi a lè Espay ap rankontre la Rusi. Venkè rankont la ap rankontre Almay ki monte yon maswife avan yo kale laTurki 3 a 2 gras ak yon gòl nan fen tan reglemantè a Philipp Lahm make an favè Alman yo--gòl fanatik yo pat wè akoz yon pwoblèm satelit.
Turki ap rankontre pèdan Espay/ Rus la, pou match konsolasyon an. Final la fikse pou Dimanch.

Football/ Brezil

Footballè lejandè Brezilyen Pele inogure yon ekspozisyon nan Brazilya pou make 50 tièm anivèsè depi Brezil te ranpòte premye koup du mond li. Non sèlman moun kap viv O Brezil pral gen chans asiste nan ekspozisyon an men fanatik lòt peyi pral gen chans la tou nan okazyon yon toune nasyonal e entènasyonal.

Football/ Etazuni

Footbalè ameriken Carlos Bocanegra ki sot pase 5 kan ap jwe nan klub Angle Fulham ap transfere nan klub Franse Rennes apre li siyen yon kontra 3 zan. Nouvèl yo pa di konbyen klub franse a peye pou sèvis ameriken an.

Antrenè seleksyon basketball Univèsite Connecticut la Geno Auriemma ap rete nan tèt seleksyon an juskan 2013 apre responsab yo siyen yon kontra 5 kan pou 8 milyon dola. Antrenè Geno gen yon palmarès 657 viktwa ak 122 defèt ak 5 tit: 1995, 2000, 2002,2003 ak 2004.

Basketball/ Etazuni

Michael Beasley ak Derrick Rose konsidere kòm numewo 1 e 2 lè Asosyasyon Nasyonal Basektball Ameriken an ap fè tiraj osò kap pèmèt ekip yo seleksyone nouvo rekru pou pwochen sezon an. Tiraj la ap dewoule aswè a.

Tennis/ Wimbledon

Ameriken Venus Williams kalifye pou 3 zièm tou tounwa tenis Wimbledon nan apre li elimine Britanik Anne Keothavong an 2 manch 7-5, 6-2. Venus pral rankontre espayòl Maria Jose Martinez Sanchez ki te bezwen 3 manch pou l debarase l de Endyèn Sania Mirza 6-0, 4-6, 9-7. Rus Maria Sharapova tonbe devan Alla Kudryavtseva 6-2,6-4. Ameriken Lindsay Davenport ki te supoze rankontre arjantin Gisela Dulko, abandone tounwa akoz blesu.
Franse Amelie Mauresmo abandone tounwa a tou
Bò kote mesye yo Espayòl Rafael Nadal te fè anpil efò avan li wouze Ernst Gulbis 5-7, 6-2, 7-6, 6-3. Nadal pral rankontre Alman Nicolas Kiefer ki pat rankontre difikilte pou l kale Arjanten Martin Vassallo Arguello 6-0, 6-3, 6-1. Lòt kalifye yo se franse Arnaud Clement. Otrichyen Jurgen Melzer ak Rus Mikhail Youzhny.

Olynpik/ Etazuni


Antrenè seleksyon feminen Olenpik ameriken an fè konnen Etazuni gen yon ekip ki pi djanm ane sa a konpare ak je zolenpik Atè n yo lè Etazuni te ranpòte 25 meday. Responsab la, Jeanette Bolden, di Etazuni pral chache ranpòte pi plis meday posib.

XS
SM
MD
LG