Accessibility links

Breaking News

Etazuni Publiye Vil pou Semi Final KONKAKAF la


Football

Responsab football yo nan KONKAKAF la anonse DC United, Chivas USA, Houston ak New England Revolution kòm reprezantan Etazuni nan premyè edisyon Lig Chanpyon KONKAKAF la ak patisipasyon 24 klub. Premye tou a ap demare 16 Septanb ak patisipasyon DC United ak klub Meksiken Atlante. Tounwa preliminè a ap kòmanse 26 Out ak patisipasyon 16 klub.

Tounwa a sa a ap ranplase chanpyona KONKAKAF dè klub chanpyon ak vis chanpyon ak reprezantan 2 klub Kosta Rika, Salvador, Gwatemala, Honduras ak Panama. Kanada, Belize, ak Nikaragwa ap gen yon reprezantan yo chak san bliye 3 reprezantan rejyon Karayib la. 2 meyè pami 4 group yo ap kalifye pou faz dechoukaj la nan yon seri ale/retou. Venkè a ap kalifye pou koup du mond klub yo an Desanm 2009.

Etazuni anonse vil kote rankont semi final eliminatwa koup du mond Afrik du Sud 2010 la. Vil sa yo se Washington, Chikago ak Denver. Avan sa ameriken yo dwe elimine Barbados nan yon seri ale/retou kap kòmanse 15 Jwen nan Karson an Kalifòni. Si Etazuni kalifye lap rankontre swa Gwatemala ou byen Sent Lusi le 20 Out answit Kuba ou Antigua e Barbuda le 6 Septanb. Match Etazuni a domisil yo fikse pou 10 Septanb, 11 epi 15 Oktòb. Etazuni gen pou jwe 2 match chofe jarèt kont Angletè le 28 Me, Espay le 4 Jwen epi Arjantin le 8 Jwen.

Klub Rus Zenit St Petersburg ranpòte koup UEFA a gras ak yon swif li pase klub Ekosè Glasgow Rangers nan Manchester City.

Responsab football Sud Koreyen yo gen konfyans match kalifikatif koup du mond yo gen pou jwe kont Kore du Nò ap dewoule nan Sewoul malgre Nò Koreyen yo mande FIFA pou rankont la dewoule sou yon teren neut.

Gouvènman Rus la mande fanatik Angle yo pou bwè dlo nan vè e respektè vè lè yap vinn asiste final Lig Chanpyon an Mèkredi pwochen nan vil Moskou ant Manchester United ak Chelsea. Minis Spò Rus la fè konnen yo mobilize plis pase 6 mil polisye pou garanti sekurite rankont la fas a posibilite pou 50 mil fanatik Angle vinn asiste final la.

Basketball

Paul Pierce make 29 pwen pandan Kevin Garnett ajoute 26 pou pèmèt Boston Celtics ranpòte yon viktwa tou mens 96 a 89 devan Cleveland Cavaliers yè swa. Celtics yo ap domine seri 7 match la ak 3 viktwa kont 2 defèt. 2 ekip yo ap rankontre demen Vandredi nan Cleveland. Nan konferans de Lwès la Los Anjeles Lakers ranpòte yon viktwa tou mens111 a 104 fas a Utah Jazz. Lakers yo ap domine seri a ak 3 viktwa kont 2 defèt. 2 belijeran yo ap rankontre demen Vandredi pou 6 zièm rankont semi final la konferans de Lwès la.

Tennis

Chanpyon Open Ostrali a Rus Maria Sharapova ap ranplase bèlj Justin Henin kòm nouvo numewo 1 mondyal tenis feminen an. Henin te suprann mond spòtif la apre li te anonse retrèt li brid soukou mwens ke 2 semen avan debu tounwa tenis Roland Garos la. Sa fè 4 trièm fwa Sharapova ap klase kòm numewo 1 tenis mondyal feminen. Henin se premye fanm ki pran retrèt li pandan li klase kòm numewo 1 mondyal.

Numewo 1 tenis mondyal maskulen an Swis Roger Federer kalifye pou kar de final tounwa tenis dè Mèt Hambourg la gras ak yon viktwa an 2 manch li ranpòte devan Swedwa Robin Soderlinig 6-3, 6-2. Espayòl David Ferrer tonbe fas anba devan konpatriòt li Fernando Verdasco 7-6, 6-2. Italyen Andreas Seppi kapote arjanten Juan Monaco 6-0, 6-3. Verdasco ap rankontre Federer nan kar de final la.

Sèb Novak Djokovic elimine kwat Ivo Karlovic 7-6, 6-3 pou l rankontre Espayòl Albert Montanes ki elimine Sèb Janko Tipsarevic 6-2, 6-1. Lòt kalifye yo se espayòl Carlos Moya ki elimine Rus Marat Safin 6-2, 6-7, 6-1. Tounwa sa yo antre nan kad tounwa tenis chofe jarèt avan 2 zièm tounwa tenis Roland Garos la kap kòmanse 25 Me kap vini la a nan vil Pari an Frans.

XS
SM
MD
LG