Accessibility links

Breaking News

La Chin Leve Baryè pou Jounalis yo


Chine/ Je zolenpik

Komite Olenpik Entènasyonal la di li jwen asurans nan men gouvènman chinwa a jounalis yo ap gen aksè lib sou entènèt la e ke yo pap mete restriksyon sou retransmisyon an dirèk pandan konpetisyon an. Responsab la ki tap rankontre jounalis yo jodi a nan vil Peken di pap gen oken entèdiksyon pou anviwon 30 mil jounalis kap kouvri je yo. Medya ki achte dwa retransmisyon yo kapab fè retransmisyon yo an dirèk lè yo pipito kelkeswa kote yo chwazi pou fè retransmisyon an menm sou plas Tienamen nan. Anons sa a fèt nan moman militan Tibeten yo di gwo mezu sekurite ak reduksyon pakou tòch Olenpik la an End pap anpeche yo fè deblozaj pou pètube pasaj relè tòch olenpik la.

Basketball

Ramon Sessions make 3 pwen kèk sekond avan fen tan reglemantè pou pèmèt Milwaukee Bucks ranpòte yon viktwa 110 a 109 devan Washington Wizards ki te gen sèvis vedèt ekip la Gilbert Arenas apre yon absans 66 rankont pou blesu. Arenas make 17 pwen nan defèt la. Nan Boston Kevin Garnett make 20 pwen epi trape balon an 11 fwa pou ede Celtics yo wouze Indiana Pacers 92 a 77. Boston Celtics bezwen 2 viktwa pou l konsidere kòm tèt de seri numewo 1 faz final la nan konferans de Lès la. Nan yon match enpòtan nan konferans de Lwès la Alman Dirk Nowitzki make 18 pwen pou ede Dallas danse sou Golden State Warriors 111 a 86. Toronto Raptors pèdu an pwolongasyon devan Atlanta Hawks 127 a 120.

Football

Match ale kar de final koup Unyon Football Eropeyen an ap demare jodi a lè Bayern de Munik ap akeyi Getafe. Bayer Leverkussen kont Zenith de Saint Petersburg. Glasgow Rangers ap akeyi Sporting Lisbon. PSV Eindhoven pral lakay Fiorentina. Klub Turk Fenerbahce, ke brezilyen Zico ap antrene, suprann klub Angle Chelsea ak yon viktwa 2 a 1 nan kad match ale kar de final lig dè chanpyon Eropeyen an. Nan lòt rankont Liverpool fè match nul 1 a 1 ak Arsenal.

Houston Dinamo fè match nul 0 a 0 ak klub Kosta Riken Deportivo Saprissa nan semi final ale chanpyona KONKAKAF dè klub chanpyon ak vis chanpyon. Federasyon Football Beliz la ap negosye pou l jwe pwochen match a domisil kont Meksik nan 2 zièm tou eliminatwa koup du mond nan Los Anjeles ou byen nan Houston-2 bastyon seleksyon meksiken an. Rezon desizyon an stad football Beliz la pa satisfè kondisyon FIFA yo.

An Frans Pari Sen Jermen soti nan zòn relegasyon an gras ak yon viktwa 1 a 0 li ranpòte devan Racing de Strasbourg yè Mèkredi nan Park dè Prince nan vil Pari.

Tennis

Numewo 1 tenis mondyal la Swis Roger Federer ap rankontre ameriken Andy Roddick nan tounwa tenis Ericcson nan kap dewoule tou pre vil Miami. Venkè rankont la ap rankontre nan semi final venkè rankont ant Rus Nikolay Davydenko ak Sèb Janko Tipsarevic. Nan lòt semi final la espayòl Rafael Nadal pral kwaze rakèt ak Tchèk Tomas Berdych. Ameriken Sereran Williams pral kwaze rakèt ak Rus Svetlana Kuznetsova nan kategori meda m yo. Venkè rankont la ap rankontre an final venkè lòt semi final la ant Sèb Jelena Jankovic ak Rus Vera Zvonareva.

Yè swa toujou nan menm tounwa a sèb Jelena Jankovic kalifye pou semi final apre Rus Elena Dementieva abandone rankont la akoz yon doulè nan do. Jankovic, ki se 3 zièm jwèz mondyal, pral rankontre nan semi final la Rus Vera Zvonareva ki elimine an 2 manch konpatriòt li Dinara Safina 7-5, 6-4. Bò kote mesye yo Espayòl Rafael Nadal elimine ameriken James Blake 3-6, 6-3, 6-1. Rus Igor Amdreev tonbe devan tchèk Tomas Berdych 6-4, 6-4.

XS
SM
MD
LG