Accessibility links

Breaking News

Mas an Foli ap Demare Weekend sa a


Basketball Universitè

Responsab lig basketball univèsitè yo seleksyone 65 ekip ki pral patisipe nan tounwa Mas an foli a apre final yon seri de konferans ki dewoule pandan weekend nan. Univèsite North Carolina ranpòte pou yon 17 tièm fwa tit Konferans Kot Atlantik la apre viktwa 86 a 81 yo ranpòte devan Clemson.

Ak 32 viktwa 2 defèt North Carolina Tar Heels non-men kòm tèt de seri numewo 1 nan brackèt Esla kote li pral rankontre Mont Saint Mary. Tit group 12 konferans al jwen Kansas apre viktwa 84 a 74 yo ranpòte devan Texas. Tekzas se tèt se de seri zòm Midwès la.

Tit group Sud la al jwen Memphis pandan ke UCLA se tèt de seri numewo 1 nan zòn Wès la. Venkè 4 zòn yo ap rankontre nan semi final nan San Antonio Tekzas 5 Avril epi final la fikse pou 7 Avril. Ohio State ak Florida Gators, finalis sezon pase a, pa kalifye.

Rezulta kèk rankont, ki dewoule yè swa nan NBA a, Houston Rockets wouze Los Anjeles Lakers 104 a 92. Dallas Marvericks wouze Maimi Heat 98 a 73. Cleveland Cavaliers te fè anpil efò avan li kale Charlotte Bobcats 98 a 91. Denver Nuggets pilon-nen Seattle Supersonics 168 a 116.

Football

Kanada ak Gwatemala kalifye pou semi final eliminatwa je zolenpik yo apre rankont ki jwe yè swa nan Karson an Kalifòni. Gwatemaltèk yo kalifye malgre rakle 5 a 0 yo pran nan men Kanada ki fini 2 zièm ak 4 pwen. Nan 2 zièm rankont la Meksik, ki te bezwen 6 gòl diferans pou l kalifye, wouze Ayiti ak yon viktwa 5 a 1-yon rankont kote Ayiti jwe ak 9 jwè akoz 2 katon wouj abit la distribye. Ayiti, ki te bezwen yon match nul pou l te kalifye, kontribye nan eliminatwa Meksik akoz gadyen an sove ekip nwa e wouj la an plizè okazyon san bliye plizyè opòtunite liy datak Meksik la rate. Meksik fini an 2 zièm pozisyon ak 4 pwen menm jan ak Kanada men Kanadyen yo kalifye sou gòl diferans.

Ofisyèl klub Meksiken yo pral reyuni 31 Mas kap vini la a pou deside sò antrenè seleksyon an Hugo Sanchez apre eliminasyon seleksyon an.

Nan semi final la ki fikse pou Jedi 20 Mas nan Nashville , Tennessee, Etazuni ap rankontre Kanada epi Gwatemala kont Honduras. An Eròp Barselòn, kap talon-nen Real Madrid nan kous tit espayòl la, bite nan wout apre match nul 2 a 2 yo fè ak Almenia. Real Madrid redui a 7 pwen avans li genyen nan chanpyona a apre defèt 1 a 0 li subi devan Deportivo la Coròy.

An Itali Inter de Milan ogmante avantaj li ak 6 pwen nan klasman jeneral la chanpyona seri A a gras ak yon viktwa 2 a 1 yo ranpòte devan Palerme. Inter de Milan repran plas li nan tèt klasman jeneral la malgre AS Wòm ranpòte yon viktwa 2 a 1 devan Milan AC. Nan klasman jeneral la Inter de Milan gen 67 pwen pou 28 rankont. AS Wòm gen 61 pwen. Juventus de Turen klase 3 zièm ak 7 pwen dèyè AS Wòm epi Milan AC klase 5 kièm.

An Angletè Liverpool pran yon avantaj dèyè 4 trièm plas la apre yo remonte yon defisi pou kale Reading 2 a 1. Manchester United kontinye ap ranfòse pozisyon nan klasman jeneral la gras ak yon viktwa 1 a 0 li ranpòte devan Derby County aloske Arsenal fè match nul 1 a 1 ak Middlesbrough.. Manchester United nan tèt klasman jeneral la ak 67 pwen pou 29 rankont. Liverpool an 2 zièm pozisyon ak 67 pwen pou 30 rankont. Answit nou jwen Chelsea an 3 zièm, pozisyon ak 64 pwen.

An Almay, Bayern de Munick ki nan tèt klasman jeneral la ak 50 pwen pran yon chòk apre yo tonbe devan Energie Cottbus ki byen ba nan klasman an.

An Frans Olympik de Lyon kontinye ap domine chanpyona a apre swif 3 a 0 yo pase Monaco nan moman yap chache yon 7 tièm tit afile. Apre 29 rankont Lyon gen 61 pwen swa 6 pwen devan Gironden de Bordo ki woule Racing Strasbourg 3 a 0. Nancy klase 3 zièm apre match 1 a 1 yo fè ak Sochaux.

An Oland Luis Suarez make 3 gòl nan rakle Ajax Amsterda m pase Willem II Tilburg. Viktwa ki diminye ekar ki separe Ajax ak lidè champyona a PSV Eindhoven ki fè match nul 1 a 1 ak Roda JC Kerkrade. Feyernoord klase an 3 zièm pozisyon.

Otorite FIFA yo, ki sot reyuni sa pa gen lontan, dakò pwopozisyon pou l ogmante gwosè teren an 105 mèt par 68 mèt. Nouvo règleman yo pap afekte stad ki deja konstrui yo.

Je Zolenpik

Minis Spò Unyon Eròp la kap reyuni nan Sloveni ansanm ak Komite Olenpik yo fè konnen yap kouche an kwa kont tout tantativ ki ta vize boykote je zolenpik Peken yo, Konsansus jeneral ki soti nan rankont la sèke patisipan yo politik pa dwe makònen ak spò. Responsab yo site kòm ekzanp boycotaj pandan yon seri de je zolenpik pat mennen oken kote.. Vandredi pase lidè Eropeyen yo te kritike operasyon sere boulon la chin ap men-nen nan Tibet san yo pa rive lanse apèl pou yon boykotaj.

Komite Olenpik Entènasyonal la anonse etud sou kalite lèr la nan vil Peken bay pi bon rezulta ke yo te espere menm atlèt kap patisipe nan spò andurans yo kapab a risk. Komite Olenpik Entènasyonal la anonse lap mete sou plas yon seri de plan durjans pou l obsève kalite lèr atlèt yo ap respire pandan konpetisyon an e menm kapab ranvwaye konpetisyon andurans yo selon rezulta rechèch yo. Dapre nouvèl yo otorite chinwa yo kapab entèdi juska 1 milyon machin sikile pandan konpetisyon an pou konsève kalite standar èr la.

Prezidan komite Olenpik entnasyonal la Jacques Rogge eksprime enkyetud li konsène atak sere boulon gouvènman chinwa a ap men nen kont nan Tibet. Msye Rogge, ki tap vizite Sent Luci, rejte tout ide boycòt akoz vyolans ki gen an chin. Msye Rogge tout boy kòt ap senpleman puni atlèt yo.

Cyclisme

Siklis Italyen Davide Rebellin ranpòte kous bisiklèt Pari/ Nis la apre espayò Luis-Leon Sanchez ranpòte 7 tièm etap konpetisyon an.

XS
SM
MD
LG