Accessibility links

Mèkredi se Dezièm Jounen Eliminatwa KONKAKAF la


Football

Demen Mèkredi pral gen aktivite nan zòn KONKAKAF la nan kad premye faz eliminatwa zòn nan kote pral gen 6 rankont. Nan Rozo la Dominik ap rankontre Barbad. Nan Oranjestad Antigua e Barbuda pral fè fas ak Aruba. Turk and Caicoas kont Saint Lucie nan Pwovidenciales. Beliz ap akeyi Sen Kitts and Navis nan stad San Mateo Flores la nan Gwatemala. Salvador ap akeyi Anguila epi Nikaragwa kont Antiy Neerlandèz. Seri retou a ap jwe le 26 Mars ansanm ak 3 match eliminasyon dirèk.

Demen Mèkredi a balon pral woule sou plizyè kontinan. Pami rankont sa yo Meksik ap rankontre Etazuni nan yon match chofe jarèt ant 2 belijeran nan KONKAKAF la epi Ayiti gen pou rankontre Venezuela.

Nan Gana kote koup dAfrik dè nasyon ap dewoule Cameroun ak Ejipt jwen dènye tikè pou semi final konpetisyon an kap demare Jedi. Kamerounè kale Tunizi 3 a 2 gras ak yon gòl yo make pandan arè de je yo. Ejip kalifye apre li wouze Angola 2 a 0. Nan semi final la Ejipt ap rankont Kot Divwar epi Cameroun kont Gana. Venkè yo ap kalifye pou final la ki fikse pou Dimanch.

Demen Mèkredi a Angletè ap akeyi la Swis san David Beckham ke antrenè Capello mete akote.

Tennis

Federasyon Tenis Entènasyonal la òganize tiraj osò semi final konpetisyon an pou group mondyal la. Seri 5 match yo ap demare 26 e 27 Avril. Nan memm jounen an semi final group mondyal la ap dewoule lè la Rusi ap akeyi Etazuni epi Espay pral lakay la Chin.

Nan tiraj osò ki dewoule jodi a nan vil Lond, Itali ap akeyi Ukrè n nan faz final pou detèmine peyi ki pral nan group mondyal la. La Frans prale lakay Japon, Arjantin ap akeyi Almay epi Republik Tchèk ap fè yon kout pye lakay Izrayèl. Nan group 2 a repechaj la Otrich ap akeyi la Swis, beljik prale lakay Kolonbi, Sèbi ap vizite Kwasi epi Slovaki ap akeyi Uzbekistan.

Atletisme

2 atlèt Bulgar ap rate Je zolenpik Peken 2008 yo apre yo pèdu apèl yo te fè nan yon tribunal kont entèdiksyon 2 zan. Tribunal Spòtif Abritraj la kore sanksyon kap peze kont kourè 400 mèt Bulgar Vanya Stambolova ak sot an wotè Venelina Veneva ki te teste pozitif pou testosteròn an Janvye 2007.

Basketball

Allen Iverson te fè yon efò dènye sekond pou pèmèt Denver Nuggets ranpòte yon viktwa de justès 105 a 103 devan Portland Trail Blazers an pwolongasyon. Iverson make 25 pwen pandan ke Carmelo Anthony kore viktwa a 28 pwen pandan li trape balon an 15 fwa. Phoenix Suns danse sou Charlotte Bobcats 118 a 104. Utah Jazz pilon-nen New Orleans Hornets 110 a 88.. Dallas Marvericks te fè anpil efò avan li kale Orlando Majik 107 a 98. Miami Heat subi pi gwo defèt gras ak yon swif Toronto Raptors pase yo 114 a 82. Atlanta Hawks remonte yon defisi 20 pwen pou l kale Philadelphia 76ers 96 a 91. Los Anjeles Clippers mete fen nan 9 defèt afile li subi an deplasman pou l kale New York Knicks 103 a 94. Houston Rockets te fè anpil efò avan li kale Minnesota Timberwolves 92 a 86. Chikago Bulls te finn pa gen rezon pou l kale Seattle Supersonics 118 a 108.

Supriz nan basketball Univèsitè yo apre antrenè Boby Knight demisyone brid soukou nan tèt Univèsite Tekzas Tech. Knight, ki soulve anpil kòmantè, ranpòte yon total 902 viktwa-swa plis viktwa ke tout antrenè basketball nan divizyon 1 Univèsitè maskulen yo. Pitit gason Pat Knight ap ranplase l nan djòb la.

Responsab yo nan New York òganize jodi a yon parad pou salye viktwa New York Giants sot ranpòte devan New England Patriots. Dimanch nan Honolulu se pral rankont pibon pami pibon jwè football ameriken nan 2 konferans yo.

XS
SM
MD
LG