Accessibility links

Etazini: Prezidan Bush ak Kongrè a Antann yo sou yon Pwogram pou Relanse Ekonomi an


Administrasyon Bush la ak Kongrè ameriken an jwenn yon akò pou yo relanse ekonomi amerikèn nan. Daprè akò sa a, yon afè de 116 milyon ameriken pral benefisye yon rediksyon taks k ap monte rive 150 milya dola. Nan kad rediksyon taks la, sitwayen kalifye yo pral resevwa 600 dola; yon koup marye ap jwenn 1200 dola, plis 300 dola pou chak timoun. Prezidan Bush bay lidè tou lè 2 chanm yo konsèy pou yo pa pèdi tan pou yo vote e apwouve akò a.

Divès lidè nan Kongrè a (demokrat kou repibliken) pran lapawòl pou yo di kijan yo kontan gouvènman an rive jwenn akò a avèk yo, menm si kèk nan yo rekonèt se pa yon pwogram pafè.

Pami palmantè ki pale konsa yo, genyen prezidan Chanm dè Reprezantan an, Nancy Pelosi (Demokrat-Kalifòni), John Boehner, lidè minorite repibliken an nan Chanm nan, avèk lidè majorite demokrat la nan Sena a, Harry Reid. Minis Trezò ameriken an, Henry Paulson, te negosye ak palmantè yo nan non La Mezon Blanch.

Klike sou lyen anlè a pou w koute repòtaj VOA sou akò Prezidan Bush ak Kongrè a jwenn nan jounen jedi 24 janvye 2008 la.

XS
SM
MD
LG