Accessibility links

Breaking News

Seleksyon Football Ameriken an Kòmanse Preparatif yo


Football

Landon Donovan nan tèt lis 26 jwè antrenè seleksyon ameriken an konvoke nan kad match amikal Etazuni gen pou jwe kont la Swèd 19 Janvye. 3 pami seleksyone yo ap jwe nan klub Skandinav lòt yo ap jwe nan Lig football balonwon ameriken an. Apre rankont la pifò jwè kap evolye sou kontinan Eropeyen an pral rejwenn seleksyon an pou prepare pwochen match ameriken yo gen pou jwe kont Meksik nan Houston. Ameriken yo ap kòmanse kanpay kalifikatif koup du mond la kont Barbad ou la Dominik nan yon seri ale/ retou 14/15 e 21/22 Jwen.

Yon responsab federasyon football Kameroun anonse anulasyon antrenman an altitud seleksyon an ta pral fè pou prepare faz final Koup Peyi Afriken yo kap dewoule nan Gana mwa sa a akoz vyolans apre publikasyon rezulta eleksyon prezidansyèl yo.

La près an Chin rapòte footballè chinwa yo pran angajman pou fèt tout sa yo kapab pou pèmèt kalifikasyon seleksyon an apre responsab pwomèt chak footballè plis pase 1 milyon dola si yo kalifye pou faz final la. La Chin trouve l nan sa yo ekspè yo rele group lanmò nan zòn Azyatik la ansanm ak Ostrali, Irak ak Katar. 2 premye nan chak group yo ap kalifye pou eliminatwa final zòn Azyatik la.

Otorite yo ofri 500 mil yuan chak fwa chinwa yo kale yon seleksyon ki klase pami 50 premye klasman FIFA a ou byen 300 mil yuan pou chak seleksyon ki klase nan yon nivo piba. Antrenè klub football espayòl FC Barselòn pa seleksyone Ronaldhino nan okazyon match retou koup Wa a kont Alcoyano-yon klub 3 zièm divizyon espayòl.

Yon otopsi ki fè sou footballè Ekosè Phil O’Donell, revele msye mouri ak arè kadyak apre li te sot tonbe 2 pye long nan okazyon yon rankont football. Responsab yo ranvwaye 3 rankont ki te dwe jwe jodi a. Funeray la fikse pou Vandredi.

Tennis

Tchèk Nicole Vaidisova ak ansyen numewo 1 mondyal feminen franse Amelie Mauresmo kalifye pou kar de final tounwa tenis Gold Coast Ostralyen an. Vaidisova te bezwen 2 manch pou l debarase l de Alman Tatjana Malek 6-4, 6-2. Manmzèl pral rankontre nan kar de final la chinwa Li Na ki kalifye apre li woule ak kout rakèt Ostralyen Adamczak 6-3, 6-2.

Mauresmo bò kote pa l elimine konpatriòt li Nathalie Dechy 6-4, 6-3 pou l al rankontre Swis Patty Schnyder ki elimine Italyen Francesca Schiavone 2-6, 6-3, 6-4. Lòt kalifye yo se chanpyon sòtan an Rus Dinara Safina ki pral rankontre Izrayelyen Shahar Peer epi Slovak Dominika Cibulkova kont Belarus Victoria Azarenka. Tounwa a antre nan kad tounwa chofe jarèt avan debu premye tounwa tenis Open Ostrali a premye tounwa Gran Shelem pou ane a kap kòmanse 14 Janvye nan vil Melbourne.

Rus Vera Zvonareva pral rankontre Neo Zelandè Marina Erakovic nan kar de final tounwa tenis Nouvel Zeland la. Ameriken Lindsay Davenport ap rankontre Italyen Sara Errani. Rus Maria Kirilenko kont Otrichyen Tamira Paszek. Slovèn Katarina Srebotnik kont franse Aravane Rezai.

Franse Paul Henri Mathieu ap rankontre nan kar de final tounwa tenis maskulen Adelaide la kont Ostralyen Joseph Sirianni. Yon lòt franse Michael Llodra kont Benjamin Becker. Venkè tounwa a ap resevwa 74 mil dola.

Sèbi kale la Frans 2 a 1 nan match ekip miks doub tounwa tenis koup Hopman nan. Arjanten yo tonbe devan Taiwan 2 a 0. Sèb yo ap rankontre ak Arjantin nan final group A a demen Jedi a epi Taiwan pral mate balon fas a la Frans nan group A. Toujou demen Jedi a Etazuni pral kwaze rakèt ak Ostrali epi End kont Republik Tchèk nan group B a. Ekip ki fini an premyè pozisyon nan chak group ak rankontre an final Vandredi swa.

Espayòl Tommy Robredo elimine nan tounwa tenis Open Katar la fas a arjanten Agustin Calleri 6-4, 6-4. Rus Nikolay Davidenko te bezwen 2 manch 6-3, 6-0 pou l kale alman Benecikt Dorsch. Menm situasyon an pou britanik Andy Murray ki pase bèlj Olivier Rochus 2 kout rakèt 6-0, 6-2. Ansyen chanpyon konpetisyon an alman Rainer Schuettler remonte yon defisi pou l kale woumen Andrei Pavel 1-6, 6-2, 6-0.

Basketball

Kèk match basketbaball kap dewoule aswè a nan NBA. Washington Wizards ap akeyi Detroit Pistons. Sakramento Kings ap fè yon deplasman lakay New York Knicks. Boston Celtics ap akeyi Houston Rockets. Golden State Warriors pral lakay Dallas Marvericks. Se kèk pami 12 rankont kap dewoule aswè a

Chanpyon an tit tounwa basketball Izrayelyen Maccabi de Tel Aviv ranplase antrenè Oded Kattash apre ekip la mal demare sezon an. Responsab yo se yon demisyon e non yon revokasyon.

Atletisme

Kourè ameriken Justin Gatlin resevwa yon suspansyon 4 tran pou uzaj testosterone an 2006--sa vle di msye pap defann tit 100 mèt nan Je zolenpik Peken yo an 2008. Gatlin, ki te pataje rekò 100 mèt la ak Jamayiken Asafa Powell, ta renmen responsab yo redui suspansyon an 2 zan pou l kapab elijib pou je zolenpik Peken yo.

Boks

Doktè yo nan yon lopital nan Sewoul deklare lanmò boksè Sud Koreyen Choi Yoi-sam ki te pèdu konesans nan okazyon yon match boks 25 Desanm pase a

XS
SM
MD
LG