Accessibility links

Breaking News

Yon Footballè Ameriken Mouri Asasinen nan Florid


Football

Fanatik Football Washington Redskin yo an dèy apre footbalè Sean Taylor, ki gen 24 tran, mouri jodi a. Yè Lendi a la polis nan arondisman Dade nan Miami te rann nan rezidans footbalè a apre yo te resevwa yon kout fil pou di footballè te resevwa yon bal nan sikonstans ki poko klè. Dapre nouvèl Taylor ta mouri ak koz li ta pèdu twòp san.

Atletisme

Kourè lejandè Jamayiken Herbert McKenley, yon ansyen detantè rekò du mond 400 mèt Hè mouri. McKenley se premye atlèt ki kouvri distans 40 mèt Hè a an mwens de 46 sekond. Msye te ranpòte meday darjan nan Je zolenpik Lond an 1948 pou l tounen premye pami 2 Jamayiken ki ranpòte yon meday Olenpik ansanm ak Arthur Wint. An 1952 msye te ranpòte yon lòt meday darjan nan je Helsinki yo nan kous 100 mèt la e li te manb ekip relè 400 mèt Jamayiken an.

Basketball

Golden State Warriors te fè anpil efò avan li kale Phoenix Suns 129 a 114. Tracy McGrady make 36 pwen nan viktwa 88 a 71 Houston Rockets ranpòte devan Los Anjeles Clippers. Caron Buttler make 35 pwen pou ede Washington Wizards danse sou Dallas Marvericks 110 a 98.

Football

Federasyon Football Venezuela a ap chache yon nouvo antrenè pou seleksyon nasyonal maskulen apre demisyon brid soukou Richard Paez. Venezuela klase 5 kièm nan klasman jeneral eliminatwa koup du mond 2010 la zòn Amerik du Sud . Venezuela se sèl peyi nan Amerik du Sud la ki pooko patisipe nan yon faz final koup du mond .

Balon pral woule jodi-a nan kad 5e jounen Lid Chanpyon ewopeyen-an : Klub football Liverpool pral eseye konsève espwa l pou l kalifye pou pwochen tou konpetisyon-an lè lap rankontre FC Porto. FC Barselòn bezwen yon nul pou pipiti lè lap jwe an deplasman lakay Lyon nan group E a jodi a . Nan group H la Seville kapab kalifye a kondisyon li kale klub Angle Arsenal jodi a. Real Madrid ap kalifye tou si l kale klub Alman Werder de Brem.

Nan Sidney an Ostrali Los Anjeles Galaksi tonbe devan FC Sidney 5 a 3 nan kad yon match amikal ant 2 klub yo. David Beckham make youn pami gòl Galaksi yo sou yon kou fran. An palan de Beckham , reaksyon pa suspann tonbe apre entènasyonal britanik-la sanble ta meprize yon gwoup timoun ki te reusi sove anba maladi kansè . Timoun sa-yo te vinn mayo Beckham sou yo, drapo e yo vini pou jwenn otograf foubolè vedèt-la . Sepandan Beckhan di li pat janm wè timoun-yo ."Beckham fè konnen:"Mwen pa wè timoun-yo lè-m te rive nan otèl-la mwen pase pa dèyè e mwen pa menm konen si yo te nan zò n nan. Mwen dispoze rankontre nenpòt ki kote yo prefere."

Otorite yo nan eta Bahia o Brezil ap ankete rezon ki fè yon pati nan stad lokal la brize pandan yon rankont football. Bilan an 7 moun mouri pou pipiti ak plizyè douzèn lòt blese. Mwa pase a FIFA te deziye Brezil kòm syèj pou akeyi koup du mond football la an 2014.

XS
SM
MD
LG