Accessibility links

Breaking News

Gwadloup pral Leve Defi Semi Final Koup dò KONKAKAF la


Football

Semi final koup dò KONKAKAF la ap jwe jodi a nan vil Chikago kote Etazuni ap rankontre Kanada epi revelasyon tounwa a Gwadeloup pral mate balon fas a Meksik.

FIFA ak UEFA ranvèse suspansyon yo tap pare pou enpoze kont federasyon football Masedwa a apre gouvènman sispann entèfere nan zafè football peyi. Gouvènman an finalman te aksepte manb federasyon an, ke 2 antite football rekonèt, retounen nan lokal federasyon--sa vle di klub peyi a kapab patisipe nan konpetisyon sou kontinan Eropeyenan. FIFA ak UEFA ki te bay yon delè 15 Jwen mwa Mas pase a, gen pou voye yon delegasyon ki pral fè chita pale ak pati konsène yo sou mezantant ant gouvènman an ak federasyon an.

Konsèy Administrasyon klub football britanik Manchester City rekòmande pou aksyonè yo aksepte òf anviwon 162 milyon dola ansyen Premye Minis Tailandè Thaksin Shinawatra fè pou l achte klub la. Msye Thaksin kap viv an ekzil a Lond depi Septanb 2006 apre militè te depoze l tou dousman sou pouvwa a, sèmante lap amelyore pèfòmans ekip la nan chanpyona a. Semen pase a otorite Tailandè yo te jele plis pase yon milya edmi byen ansyen Premye Minis la. Jodi a yo depoze plent pou korupsyon kont ansyen Premye Minis la ak madan m li.

Footballè Kamerounè Samuel Eto’o ansanm ak Ronaldinho ap kontinye jwe nan FC Barselòn malgre yo pa rive ede ekip la ranpòte chanpyona Espayòl la. Pawòl kap pale kounye a se posibilite pou franse Thierry Henry ta vinn jwe nan fòmasyon Katala n nan. Eto’o fè konnen li pa gen plan pou l kite FC Barselòn.

Otorite yo nan Zimbabwe revoke antrenè seleksyon football la ki elimine nan koup dAFrik dè Nasyon an.

Antrenè seleksyon Japonè a Bosnyak Ivica Osim konsidere preparasyon seleksyon an pou koup Azyatik la kòm yon plezantri akoz angajman jwè yo genyen ak klub yo. Msye di jwè lòt ekip advès yo deja ap antrene ak seleksyon yo tandike Japon prale nan Vyetnam ak yon seleksyon fatigue.

Yon responsab federasyon football End la di peyi a ap retire kandidatu l pou l ta akeyi koup Azyatik la an 2011 akoz yo pap kapab konstrui enfrastruktu nesesè pou òganize konpetisyon an.

Isit Ozetazuni Chikago Fire revoke Dave Sarachan ki pase 5 kan ap antrene ekip la akoz yon move depar nan chanpyona a.

XS
SM
MD
LG