Accessibility links

Blacksburg, Virginia:Yo Chante Yon Sèvis Finèb Pou Viktim Masak Inivèsite Virginia Tech la


Isit ozetazini, se madi 17 avril la yo chante yon sèvis finèb nan memwa 33 mounn ki pèdi lavi yo nan yon masak ki fèt nan inivèsite “Virginia Tech la” nan eta Virjini nan jounen lendi a.

Pami pèsonalite ki te patisipe nan sèvis sa a genyen prezidan Bush, plizyè lidè politik, etidyan, profesè ak manm kominote Blacksburg la kote inivèsite a trouve l.

Prezidan George Bush prete pèp ameriken an vwa li pou l eksprime panse ak santiman tout sitwayen Lèzetazini devan sa k pase sou Campus Univèsite Virginia Tech la.

Prezidan Bush di “Jodiya, peyi nou an nan dèy ansanm avèk sila yo ki pèdi moun ki chè pou yo nan Virginia Tech. Viktim yo gen yon plas nan kè nou, nou leve yo nan lapriyè nou, e nou mande yon Dieu d’amou pou Li rekonfòte sila yo k’ap soufri jounen jodiya.”

La polis idantifye asayan an kòm Cho Seung-Hui, yon etidyan sid koreyen ki gen 23 zan. Asayan an touye tèt li tou nan masak la. Jis jounen madi a, lapolis poko konnen motif masak sila a.

Reyaksyon sou masak nan inivèsite Virginia Tech la: Otorite yo nan Kore di Sid prezante kondoleyans yo bay fanmi viktim yo, aprè yo finn aprann ke moun lapolis sispèk kòm atakan nan zafè sa a, se yon sitwayen sid koreyen.

Ajans nouvèl Kore di Sid la, Yonhap, fè konnen prezidan peyi a, Roh Moon-Hyun, voye kondoleyans li bay fanmi plis pase 30 moun ki mouri nan atak yo. Misye Roh kontinye pou l di li gade lespwa ke sila ki blese yo va jwenn gerizon byen vit.

Yon otorite nan Ministè afè etranjè sid koreyen an pale pou l di li espere sa ki rive la a pa pral pote okenn move konsekans pou sid koreyen k’ap viv ozetazini. Sekretè jeneral LONU an Ban ki-Moon ki, li men tou se yon sid koreyen, kondane masak la.

Daprè otorite ameriken yo, sispèk la, Cho Seung-Hui tap viv ozetazini depi l te yon ti gason. Pami lòt lidè ki ofri kondoleyans bay fanmi viktim yo, genyen premye minis britanik la, Tony Blair.

PWOFIL ATAKAN AN

Otorite yo nan Univèsite Virginia Tech dekri nèg ame ki ouvè kout zam lendi a sou etudyan yo kòm yon solitè, yon moun ki te konn izole tèt li, e yo fè konnen yo gen pwoblèm pou yo konnen plis enfòmasyon sou li.

Cho Seung-hui se te yon etudian nan dènyie ane li nan univèsite a, ki t’ap etudye literati anglèz.

Paul Kim, yon kondisip klas li fè Sèvis Koreyen La Vwadlamerik la konnen Cho Seung-hui te reyèlman yon etidyan ki pa t tèlman sosyalize.

Kim deklaré Cho te toujou ap gadé atè, san gadé pèsonn nan je, e menm dè fwa li te konn refizé reponn pwofesè li yo lè yo te poze l yon kesyon. Etudyan sa a ki te sòti Koré di Sid, te gen 23 zan, e l t’ap viv isit ozetazini depi ane 1992.

VYOLANS AK ZAM

Masak ki fèt nan inivèsite “Virginia Tech la”, vin relanse deba kap fèt sou kontwòl zam ozetazini. Daprè moun ki vle pou otorite yo sere boulon an plus sou moun ki posede zam yo, kantite zak vyolans moun komèt zam a lamen, ta redwi anpil si li te pi difisil pou yo jwenn zam.

Sepandan, sila yo ki anfavè dwa pou moun posede zam, fè konnen, si moun te kapab jwenn zam pi fasilman toujou, li t’ap pi fasil pou yon nèg ame dezame yon atakan, oubyen tire sou li.

XS
SM
MD
LG