Accessibility links

Duke Elimine nan Tounwa Basketball Universite yo


Basketball

Duke Univèsity se premye viktim nan tounwa basketbal Univèsite yo rive apre Virjinya Commonwealth remonte yon defisi pou l kale yo 79 a 77 gras ak yon basket ekip Commonwealth la make mwens ke yon sekond avan fen tan reglemantè a. Lòt ekip ki fè malèt li se Tekzas Tech ke Bob Knight antrenè ki ranpòte plis viktwa a ap antrene. Boston College remonte yon defisi pou l tronse Tekzas Tech 84 a 75. Pa gen lòt supriz--UCLA, Univèsite Maryland, Ohio State, Louisville, Tekzas A and M, George Town ak North Carolina yo tout kalifye pou 16 zièm de final la. Jodi a chanpyon an tit la ap rankontre Jakson State Univèsity.

Milwaukee Bucks suprann San Antonio Spurs ak yon rakle 101 a 90 e ki mete fen 13 viktwa afile Spurs yo. Los Anjeles Lakers pran yon rakle nan men Denver Nuggets 113 a 86. Miami Heat danse sou New Jersey Nets 93 a 86.

Football

D.C United fè match nul 1 a 1 ak Chivas de Gwadalaraja nan kad semi final ale chanpyona KONKAKAF dè klub chanpyon ak vis chanpyon ki jwe isit Washington. United egalize pandan arè de je yo. Nan lòt semi final la Houston Dinamo suprann klub Meksiken Pachuka ak yon viktwa 2 a 0.

Klub football espayòl Seville te bezwen yon gòl pwolongasyon pou kale Shaktar Donetsk 3 a 2. Seville te sou wout pou l elimine apre 4 minit arè de je yo lè gadyen an make yon gòl kònè ki suprann publik Ukreyen an. Klub Olandè AZ Alkmaar elimine Newcastle ak yon viktwa 2 a 0. Klub Espayòl kale Maccabi Haifa 4 a 0 apre 2 klub yo te fè match nul 0 a 0 nan match ale a. Benfica de Lisbon efase yon defèt li te subi nan match ale a pou l kale Paris Sen Jermen 3 a 1. Tiraj osò kar de final la fikse pou maten an nan Glasgow.

Prezidan Milan AC a, Silvio Berlusconi, di li pare pou l depoze sou tab la plis pase 110 milyon dola pou l achte sèvis vedèt football brezilyen Ronaldhino kap jwe nan FC Barselòn.

Antrenè seleksyon nasyonal ameriken an Bob Bradley konvoke 24 jwè nan seleksyon ki pral jwe 2 match amikal kont Ekwatè nan Tampa 25 Mas epi Gwatemala nan Frisko Tekzas 3 jou apre. Match antre nan kad preparatif ameriken yo ap fè avan yo patisipe nan Kopa Amerika a ak Koup dò KONKAKAF la. Ameriken nan menm group ak Arjantin, Kolonbi ak Paragwe pou Kopa Amerika a. Nan koup dò KONKAKAF la ameriken yo nan menm group ak Gwatemala, Trinidad and Tobago epi Salvador.

Tennis

Espayòl Rafael Nadal ak ameriken Andy Roddick kalifye pou semi final tounwa tenis Indian Wells la nan Kalifòni.

XS
SM
MD
LG