Accessibility links

Breaking News

Yon Juj Espayòl Rejte Ankèt ki tap Mennen sou Anviwon 60 Siklis


Cyclisme

Yon juj espayòl anule yon ankèt dopaj ki tap men-nen nan yon konpetisyon siklis san li pa akuze pèson. Juj Antonio Serrano di rezon ki fè li pa akuze pèsonn nan ankèt se akoz nouvo lwa dopaj espayòl pat an vigè lè ka a te prezante an Me 2006. Otorite yo toujou kapab ale an apèl ak desizyon juj la. Otorite yo tap ankete sou prèske 60 siklis ki te rive 2 jou avan dewoulman kous bisiklèt Tour de Frans la lè la polis te dekouvri yon swa dizan rezo dopaj san kontamine lakay yon doktè. Menm lè la justis espayòl rejte dosye a, Unyon Siklis Entènasyonal la toujou kapab deside rapousib ka a kont tout siklis yo ta suspèk ki ta enplike nan eskandal la

Boxe

Asosyasyon Entènasyonal Boks la deside revoke akò ki tap pèmèt vil Moskou akeyi chanpyona mondyal la an Septanb 2007. Selon responsab yo Moskou pa respekte delè ki te fikse pou l te renmèt yon lèt de kredi de 1 milyon 500 mil dola. Responsab yo poko anonse lòt kote kap akeyi konpetisyon an kap sèvi kòm kalifikatif je zolenpik Peken 2008 yo.

Olenpik Peken 2008

Responsab yo Je Zolenpik Peken 2008 yo ap anvizaje posibilite pou entèdi moun pa fimen nan tout enstalasyon spòtif kote konpetisyon an pral dewoule. Dapre nouvèl yo aplike entèdiksyon an chin kapab difisil an chin kote anviwon 350 milyon chinwa se fimè pa respekte zòn non fimè yo. Komite òganizatè a kòmanse yon kanpay pou chanje konpòtman chinwa yo pou pa krache nan la ri epi aprann kanpe an liy. Otorite yo mete sou pye yon lòt pwogram pou anseye angle bay pèsonèl nan otèl yo, chofè taksi ak la polis.

Tennis

Swis Roger Federer, ki domine sè n tenis entènasyonal la depi plizyè lane ak yon total 41 viktwa, pa enbatab ankò, apre arjanten Guillermo Canas woule l ak kout rakèt yè Dimanch la nan tounwa tenis Indian Wells la nan Kalifòni. Rezulta final la se 7-5, 6-2. Britanik Andy Murray elimine Sud Afriken Wesley Moodie 6-3, 6-3. Espayòl Tommy Robredo ak Chèk Tomas Berdych ranpòte la viktwa.

Basketball

Dallas Mavericks ranpòte 17 tièm viktwa afile nan NBA a apre yo tronse Los Anjeles Lakers 108 a 72. Josh Howard ak Dirk Nowitzki make 24 ak 19 pwen nan piyay la. Ak 52 viktwa kont 9 defèt Dallas Mavericks deja gen tikè l pou faz final la. Miami Heat suprann Washington Wizards ak yon viktwa de justès 106 a 104. Yao Ming make 37 pwen nan viktwa 103 a 92 Houston Rockets ranpòte devan Orlando Majik. Denver Nuggets, Cleveland Cavaliers, Detroit Pistons, Toronto Raptors ak Portland Trail Blazers yo tout ranpòte la viktwa.

Apre dènye tounwa ki diskute yè Dimanch la nan basketball univèsitè yo--63 ekip yo pare pou kòmanse tounwa Mas an foli a. Avan sa demen Madi a Florida A and M pral mate balon fas a Niagara pou jwen dènye plas ki disponib pou tounwa a kap kòmanse 15 Mas ak patisipasyon 64 univèsite ameriken. Final la fikse pou 2 Avril nan Atlanta

Football

Inter de Milan kale Milan AC 2 a 1 nan yon duèl ki mete fas a fas 2 klub nan yon menm vil. An Espay FC Barselòn rache yon match nul 3 a 3 a domisil fas a Real Madrid gras ak yon gòl arjanten Lionel Messi make pou Barselonè yo pandan arè de je yo. An Almay Werder de Brèm raproche l de 3 pwen nan klasman jeneral la apre match 1 a 1 yo fè ak Bayern de Munich. 69 mil fanatik asite rankont la ki te dewoule nan Allianz Arena a nan okazyon 25 kièm jounen Bundersliga a. Shalke 04 ki fè match nul 1 a 1 ak Hanovre nan tèt klasman jeneral la ak 50 pwen.

An Angletè Chelsea remonte yon defisi 2 gòl pou l rache yon nul nan men Tottenham 3 a 3 nan kar de final koup Federasyon Angle a yè Dimanch la. Machester United nan tèt klasman jeneral la ak 72 pwen devan Chelsea ki gen 63 pwen.

Premye final koup Konfederasyon Angle a , ki fikse pou 19 Me nan stad Wemble a, kapab mete bab pou bab Chelsea fas a Manchester United tou depan de rezulta semi final la ak match de baraj kar de final la. Nan tiraj osò ki dewoule jodi a Chelsea ta dwe kale Tottenham 19 Mas-2 ekip yo sot fè match nul 3 a 3--venkè rankont la ap rankontre ak Blackburn. Manchester United ki fè match nul 2 a 2 Middlesbrough, dwe rankontre yon lòt fwa e venkè a pral rankontre ak Watford kap jwe sou yon teren neut 14 ou by en 15 Avril.

An Ayiti 5 kièm jounen chanpyona nasyonal la bay rezulta sa a Samdi nan stad Sylvio Cator Don Bosko de Petion Ville ranpòte yon viktwa tou mens devan Ailge Nwa 1 a 0. Na vil Kapayisyen Violèt Atletik klub tonbe devan Zenith 2 a 0. Nan Leogane match ant Cavaly de Leogane ak Asosyasyon Spòtif Mirbalè pat fini akoz la pli te rann teren an enpratikab. Nan Jakmèl Viktori de Jakmèl tonbe fas anba 1 a 0 fas a Baltimore de Sen Mak. Dapre jounal en liy InfoAyiti.net

O Meksik Chivas de Guadalajara fè match nul 0 a 0 ak Pumas yè Dimanch la. An Arjantin San Lorezo ranpòte yon viktwa 2 a 1 devan Banfield pou l pran tèt chanpyona.

O Brezil veteran Romario make 3 gòl nan viktwa 4 a 1 Vasco de Gama ranpòte devan Madureira. Romario, ki te ede Brezil ranpòte koup du mond 1994 la isit Ozetazuni, bezwen 5 gòl pou l make mil bu menm kantite gòl ak footbalè lejandè brezilyen Pele te make nan karyè l. Adriano ak Ronaldo pa fè pati lis jwè antrenè seleksyon Brezil la Dunga konvoke pou patisipe nan match amikal Selacao la pral jwe kont Chili ak Gana an Swèd. Pami 22 seleksyone yo 3 jwè sèlman ap evolye o Brezil apre tout rès yo ap evolye an Eròp.

Yon responsab FIFA chante lwanj pou 2 stad brezilyen, Gremio ak Beira Rio, ki ranpli kondisyon pou match kalifikatif koup du mond 2010 la. Responsab la di stad marakana a kapab modifye pou akeyi match kalifikatif koup du mond la tou. Si modifikasyon yo fèt Brezil kapab akeyi Ekwatè 17 Oktòb nan kad match kalifikatif koup du mond la. Brezilyen Roberto Carlos anonse lap kite Real Madrid nan fen Chanpyona a.

XS
SM
MD
LG