Accessibility links

Ayiti Chanpyon Koup Digicel la


Football

Seleksyon Nasyonal ayisyen ap retounen an Ayiti kòm nouvo chanpyon Karayib la apre yo kale Trinidad and Tobago 2 a 1 pou ranpòte koup Digicel la. Alexandre Bourcicot, ki te konn jwe nan Chikago Fire ak Eliphene Cadet make yon gòl yo chak nan viktw a. Ayisyen yo te pèdu kontwòl match nan fen 2 zièm mitan an men yo te reziste atak trinidadyen yo gras ak pèfòmans gadyen -an Fenelon Gabart ak liy defans la.

An plis de koup la ayisyen yo resevwa 120 mil dola ameriken pou viktwa a aloske Trinidadyen yo resevwa 70 mil dola. Fanatik yo te mete bann rara nan la ri pou salye viktwa 11 nasyonal la. Nan Pòtoprens tankou nan vil pwovens fanatik yo te reyuni sou yon seri de plas publik pou asiste rankont la ke yo konsidere kòm yon revanch pou Ayiti ki te pèdu devan Trinidad nan premye tou a.

Kuba kale Gwadeloup 2 a 1 pou l konsole l ak 3 zièm plas la. Nap raple Ayiti, Trinidad and Tobago, Kuba ak Gwadeloup ap reprezante rejyon Karayib la nan Koup Dò KONKAKAF la kap dewoule isit Ozetazuni nan mitan ane a.

Yon lòt kote Sekretè Jeneral KONKAKAF la, Chuck Blazer anonse konpayi byè Miller Lite ap patwone koup dò KONKAKAF la edisyon 2007 la. Dapre antant la konpayi ap prezante prim meyè jwè a apre chak match.

Tennis

Bèlj Kim Clijsters kalifye pou semi final tounwa tenis Open Ostrali a gras ak yon viktwa an 3 manch li ranpòte devan Swis Martina Hingis 3-6, 6-4, 6-3 pou l al rankontre ak Rus Maria Sharapova ki elimine konpatriòt li Anna Chakvetadze 7-6, 7-5. Lòt semi final la ap mete bab pou bab ameriken Serena Williams kont Nicole Vaidisova. 2 rankont yo fikse pou Jedi.

Bò kote mesye yo Alman Tommy Haas suprann Rus Nikolay Davydenko 6-3, 2-6,1-6, 6-1, 7-5 pou l al rankontre ak Fernando Gonzalez ki elimine espayòl Rafael Nadal 6-2, 6-4, 6-3--yon defèt Nadal konsidere kòm pi move defèt nan karyè l. Rankont sa a fikse pou Vandredi. Lòt semi final la ap mete fas a fas Swis Roger Federer kont ameriken Andy Roddick demen Jedi a.

XS
SM
MD
LG