Accessibility links

Breaking News

Ayiti Kalifye pou Koup Dò KONKAKAF la


Football

Ayiti kalifye pou Koup dò KONKAKAF la kap dewoule isit Ozetazuni nan mitan ane a apre yo kalifye pou semi final koup Digicel la nan Trinidad and Tobago. Ayisyen yo kalifye apre yo kale Barbad yè swa 2 a 0 -gòl Alexandre Boucicaut ak Roody Lomera. Nan lòt rankont Trinidad and Tobago danse sou Martinik 5 a 1. Ak 6 pwen Ayiti asure kalifikasyonn pou semi final konpetisyon an kèlke swa rezulta pwochen rankont 11 ayisyen fas a Trinidad and Tobago ki bezwen yon viktwa ou byen yon nul pou kalifye pou semi final la lè yap rankontre demen Mèkredi a. Dènye fwa Ayiti te kalifye pou koup dò KONKAKAF la se an 2002 kote yo te elimine nan kar de final.

Footbalè Bayern de Munick Sebastian Deisler anonse lap pran retrèt apre yon seri de operasyon li subi nan pye. Deisler reprezante seleksyon alman an 36 fwa men blesu te fòse l reprezante Almay nan koup du mond 2002 ak 2006 la.

Jodi a group B a ap antre nan won ak rankont Gwadeloup Guyan epi Sen Vensan e Grenadin kont Kuba. Sen Vensan e Grenadin ak Gwadeloup gen 3 pwen yo chak nan group la.

Prezidan sòtan Unyon Football Eropyen an Lennart Johansson kritike toya advèsè l Michel Platini voye sou li. Johansson di li gen kè sote sou politik Michel Platini di li pral pratike si l ranpòte eleksyon pou l ta redui kantite klub kap patisipe nan diferan chanpyona Eropeyen. Eleksyon an fikse pou 26 Janvye nan okazyon kongrè Unyon Football la pral fè nan Dusseldorf an Almay.

Lig football balonwon ameriken an rejte bri kap kouri kòm kwa yap eseye yon liberasyon pibonè pou David Beckham ta vinn jwe nan Los Anjeles Galaksi. Responsab yo di amwens yon chanjman dènye minit-Beckham ap rete nan Real Madrid juskaske kontra l fini ak Real Madrid jusnan fen Jwen.

Lig football zèpòl kare ameriken an anonse yo pral jwe yon match amikal nan vil Lond ane sa a. Rankont la ki kapab jwe ant New York Giants ak Miami Dolphins pral dewoule swa nan nouvo stad Wemble a ou byen yon lòt stad nan alantou vil la.

Tennis

Rus Maria Sharapova kalifye pou 2 zièm tounwa tenis Open Ostrali a malgre chalè ak yon seri de erè li te komèt. Sharapova kale franse Camille Pin 6-3, 4-6, 9-7. Rus Anna Chakvetadze tronse otrichyen Sybille Bammer 6-4, 7-5. Ameriken Vania King tonbe devan Sèb Ana Ivanovic 6-2, 6-0. Bò kote mesye yo espayòl Rafael Nadal pase ameriken Robert Kendrick 3 kout rakèt 7-6, 6-3, 6-2. Arjanten David Nalbadian kalifye pou 2 zièm tou a apre Sèb Janko Tipsarevic abandone 6 zièm sèt la. Franse Sebastien Grosjean kalifye apre bèlj Christophe Rochus te abandone rankont la akoz pwoblèm respiratwa

Basketball

Gilbert Arenas make 51 pwen pami yo 3 pwen nan 11 sekond avan fen tan reglemantè a pou pèmét Washington Wizard ranpòte yon viktwa de justès devan Utah Jazz 114 a 111. Nan lòt Anjeles Kobe Bryant make 25 pwen nan viktwa tou mens 124 a 118 Los Anjeles Lakers ranpòte an pwolongasyon devan Miami Heat. Amare Stoudemire make 42 pwen nan viktwa 137 a 132 Phoenix Suns ranpòte devan Memphis Grizzlies. Milwaukee Bucks te fè anpil efò avan li kale Charlotte Bobcats 99 a 91. Lòt venkè yo se New York Knicks, Toronto Raptors, Chikago Bulls, Atlanta Hawks, Minnesota Timberwolves, New Jersey Nets ak Golden State Warriors.

Olympics

Anketè Italyen yo soumèt rapò final yo bay Komite Olenpik Entènasyonal la sou ankèt dopaj yo tap men-nen kont yon seri de atlèt otruchyen pandan je zolenpi dhivè 2006 yo. Komite Olempik Entènasyonal la publiye yon deklarasyon jodi a kote li di rapò a reprezante yon eleman enpòtan sou kesyon an. Pòt pawòl òganizasyon spòtif la, Emmanuelle Moureau di komisyon disiplinè a pral etudye rapò a avan yo fè rekòmandasyon bay komite ekzekutif la kap reyuni nan vil Lauzanne 7 Fevriye.

XS
SM
MD
LG