Accessibility links

Irak Ekzekite Saddam Hussein


Irak pann ansyen Prezidan Saddam Hussein:Saddam Hussein ke lajistis nan Irak te kondane pou krim kont limanite mouri pandye vandredi ve 11 zè di swa, lè Washington. Li te gen 69 van. Televizyon nasyonal irakyen an montre Saddam nan moman bouwo yo tap kondi li sou potans lan. Youn nan bouwo yo, yon kagoul kouvri figi li, pase yon kòd nan kou ansyen prezidan kanson fè Irak la. Men televivzyon an pa montre pandezon an. Apre ekzekisyon an, chèn televizyon an difize imaj kadav ansyen diktatè a lonje 2 pye long, vlope nan yon dra blan. Tèt li pat kouvri. Yon responsab irakyen ki asiste ekzekisyon an di: sa te pase top-top, msye mouri la a menm.

Menm sous la presize yo te mare Saddam 2 bra dèyè e l' te genyen chenn nan pye li, men tèt li pat kouvri. Ansyen diktatè a, avek liv Koran an (liv sakre mizilman yo) nan men li, te parèt kalm epi li fè yon dènye priyè. Anvan bouwo yo pase kòd la nan kou Saddam m'sye deklare ''li pa janm pè kikseswa sou latè beni... e l' mete pèp irakyen an an gad kont sa li rele koalisyon chiyit pwo-iranyen an--yon referans a gouvènman premye minis Nouri Al-Maliki ap dirije nan Irak la. Sami Al Askan, yon patizan premye minis Al- Malikiki ki te asiste ekzekisyon an di yon ajans nouvèl ''nou tande lè kòd la kase kou-li''.

Pandan chiyit yo, ki te viktim zak represyon anba rejim Saddam Hussein nan ap selebre, premye minis Al Maliki mande ansyen patizan defen lidè dechouke a, baasis sunnit yo, sispann rebelyon yo a e pote-kole nan pwosesus politik la. Ekzekisyon ansyen diktate irakyen an tonbe nan fen mwa kote plis ameriken pèdi lavi yo nan Irak pou ane 2006 la: 108 sòlda peri an desanm nan lagè a.

Isit Ozetazuni, prezidan George Bush a deklare lanmò Saddam Hussein reprezante yon etap enpotan nan pwosesus demokratizasyon Irak la . ''Fè Saddam rann kont devan lajistis pa pral mete yon fen nan vyolans lan, men se yon etap enpòtan sou chimen demokrasi a nan Irak. Yon demokrasi ki ka gouvène, soutni e defann tèt li pou kont li''.

Nan Irak reyaksyon devan ekzekisyon ansyen lidè irakyen an ase kalm paske li tonbe nan jou pi sakre nan kalandriye mizilman an; Eid al-Adha, ki make fen pelerinaj La Mecque la. Otorite yo pa dekrete kouvre feu nan kapital la. Chiyit yo, ki te viktim opresyon ak zak kraze pandan rèy Saddam Hussein nan desann nan lari vil Nadjaf ak nan Sadr-ville, yon bastyon chiyit pa lwen kapital irakyen an,Bagdad la, pou selebre ak kout klaksonn otomobil, Lajistis te jwenn Saddam Hussein koupab pou eliminasyon 148 chiyit li te fè ekzekite an 1982 nan vil Dujail apre yon tantativ asasinay sou li.

XS
SM
MD
LG