Accessibility links

Breaking News

Kolombi Kandida pou Koup du Mond Football 2014 la


Football

Nouvèl ki soti nan Bogota fè konnen responsab yo pral anonse pita nan jounen an ofisyèlman kandidatu Kolonbi pou òganize koup du mond Football FIFA an 2014. Brezil deja manifeste entansyonn pou l akeyi konpetisyon an.

Ajans Nouvèl Associated Press anonse gouvènman an ap prezante Mèkredi yon lèt pou l manifeste entansyonn pou l akeyi konpetisyon an nan okazyon rankont Konfederasyon Amerik du Sud la ap fè.

Mwa Juyè pase a prezidan Alvaro Uribe te deklare la ta renmen pou Kolonbi oganize koup du mond la. An 1986 Meksik te òganize konpetisyon an apre Kolonbi te deziste pou pwoblèm finansye an 1982. FIFA deja anonse konpetisyon an ap dewoule nan Amerik du Sud la pou l respekte sistèm rotasyon an.

FIFA publiye klasman jeneral seleksyon mondyal yo ak Brezil kontinye ap domine klasman pou yon 5 kièm ane malgre Itali te ranpòte koup du mond FIFA 2006 la. Brezil kloture ane a ak 10 viktwa-1 nul ak 1 defèt-defèt li te subi devan la Frans nan kar de final koup du mond la. Itali klase an 2 zièm pozisyon devan Arjantin, la Frans, Angletè, Almay, la Oland, Potugal, Nijerya ak Republik Tchèk. Etazuni klase 31 nièm dèyè Meksik ki klase 20 tièm. Nan Karayib la Kuba klase 46 zièm devan Jamayik ki klase 57 tièm devan Sen Vensan e Grenadi ki klase 85 kièm devan Trinidad an Tobago ki klase 91 zièm, Ayiti klase 102 zièm epi Republik Dominikè klase 136 zièm.

Medya Britanik yo rapòte ansyen antrenè seleksyon nasyonal Angle a Sven Goran Eriksson kapab nonmen kòn nouvo antrenè klub football franse Olenpik de Marseille. Nouvèl la publiye nan moman plizyè klub ap chache jwen sèvis Swedwa a ki te ede Angletè rive nan kar de final koup du mond la Almay 2006 la. Akò a kapab siyen disi debu ane 2007 la.

Klub Brezilyen Intenacional Porto Alegre suprann FC Barselòn ak yon viktwa 1 a 0 pou l ranpòte chanpyona du mond klub yo ki tap dewoule O Japon.. Klub Ejipsyen Al Ahly kale klub Meksiken Amerika 2 a 1 pou l konsole l ak 3 zièm plas la.

Responsab FIFA yo anonse yap leve jodi a suspann ki tap peze sou do Iran pou l pat patisipe nan oken aktivite football entènasynal apre antant FIFA jwen ak federasyon an ki pwomèt lap obeyi règleman yo.

Mwa Novanm pase a FIFA te suspann Iran de tout konpetisyon entènasyonal apre entèvansyon gouvènman an nan pwoblèm entèn federasyon an. An Desanm FIFA te leve suspansyon an tanporèman pou te pèmèt Iran patisipe nan je Azyatik yo an atandan chanjman fèt nan federasyon an. Akò a ki jwen yè Dimanch la siyifi Iran ap elijib pou l patisipe nan tiraj osò koup Azyatik la kap dewoule nan Kuala Lumpur demen Madi a.

New Orleans Saints kalifye pou faz final chanpyona football zèpòl kare a malgre yo pèdu 16 a 10 devan Washington Redskins ki elimine. Chikago Bear kore kalifikasyonn nan gras ak yon viktwa tou mens yo ranpòte devan Tampa Bay Buccaneers an pwolongasyon 34 a 31. Baltimore Ravens kalifye tou apre viktwa 27 a 17 yo ranpòte devan Cleveland Browns. Philadelphia Eagles ap reklame patisipasyonn nan faz final la apre viktwa 36 a 22 yo ranpòte devan New York Giants. Eagles yo nan tèt divizyon NFC East la devan Dallas Cowboys. Aswè a Indianapolis Colts ap akeyi Cincinnati Bengals.

Basketball

Yao Ming make 32 pwen epi trape balon an 10 fwa nan viktwa Houston Rockets ranpòte devan Los Anjeles Clippers 108 a 103. Washington Wizards te bezwen pwolongasyon pou l kale Los Anjeles Lakers 147 a 141. Gilbert Arena make 60 pwen nan viktwa a.

Tennis

An Beljik numewo 1 tenis mondyal feminen an Justine Henin-Hardenne nonmen meyè spòtif feminen pou ane 2006 la. Motosiklis Stefan Everts nonmen meyè spòtif maskulen pou ane a.

Atletisme

Eskpè yo dekouvri atlèt endyen ki fini 2 zièm nan kous 800 mèt feminen nan Je Azyatik yo, se yon gason ki tap chanje sèks li. Santhi Sounderajan diskalifye pou meday darjan li te ranpòte nan konpetisyon an apre yon tès medikal revele se pa yon fanm.

XS
SM
MD
LG