Accessibility links

San Francisco pa Kandida pou Je Zolenpik 2016 yo


Vil San Francisco abandone tantativ li tap fè pou l òganize je zolenpik yo an 2016 kèk jou apre ekip football zèpòl kare San Francisco 49ers abandone plan li te genyen pou l te konstrui yon stad. Chikago ak Los Anjeles rete sèl vil ki an konpetisyon pou konnen ki lès pami yo kap reprezante Etazuni kòm kandida. Madrid, New Delhi, Prag, Rio de Janeiro, Rom ak Tokyo manifeste enterè yo pou òganize je yo an 2016. Komite Olenpik Entènasyonal la ap seleksyone vil la an 2009.

Football

Real Madrid konfime jodi a posibilite pou yo siyen yon kontra ak adolesan brezilyen Marcelo ki gen 18 tan e kap jwe nan Fluminense. Analis yo konsidere Marcelo kòm ranplasan Roberto Carlos. An plis de Marcelo responsab yo ap konsidere posibilite pou yo fè kèk lòt transfè.

Seleksyon Brezil la pap gen sèvis Emilson nan okazyon match amikal ant Brezil ak la Swis demen Mèkredi a nan vil Bal. Dunga te deja pa gen sèvis, Ronaldo, Adriano ak Lucio. Emilson, kap jwe nan FC Barselòn blese Dimanch pase pandan yon rankont nan lig espayòl la. Antrenè Dunga konvoke Tinga kap jwe nan Borussia Dortmund. Sou yon total 22 jwè antrenè Dunga konvoke 3 sèlman ap evolye nan chanpyona nasyonal Brezilyen an.

Bò kote pa l antrenè seleksyon Alman an Joachim Low eksprime konfyans li nan okazyon match kalifikatif koup dEròp Almay ap jwe demen fas ak Chipr nan Nikozi malgre yon seri de jwè ki blese. Antrenè Low di li ta renmen fini ane a ak yon viktwa. Alman yo klase 2 zièm ak 9 pwen nan group D a swa 1 pwen dèyè Republik Tchèk ki jwe yon match an plis de Alman yo.

Fanatik football Danwa yo non-men footballè Michael Laudrup, ki te jwe nan Juventus, Real Madrid ak FC Barselòn, kòm meyè footballè nan istwa football peyi a. Laudrup mete fen nan karyè entènasyonal an 1998 apre li jwe 104 match pou seleksyon nasyonal e make 37 gòl.

Carolina Panthers kale Tampa Bay Buccaneers 24 a 10 malgre yo te mal kòmanse. Panthers yo genyen yon palmarès 5 viktwa 4 defèt.

Basketball

Cleveland Cavaliers pase yon vitès superyè pou l kale New York Knicks 102 a 96 nan New York. New Jersey Nets tonbe devan Seattle Supersonics 119 a 113. Orlando Majik remonte yon defisi pou l kale Boston Celtics 92 a 89.

XS
SM
MD
LG