Accessibility links

Jamayik Kale Kanada


Nan match amikal entènasyonal Jamayik kale Kanada 2 a 1 yè Dimanch la nan Kingston Jamayik--yon viktwa kap pèmèt publik la reprann konfyans apre eliminasyon Reggae Boys yo nan koup Digicel la. Jamayiken yo ap akeyi Peru le 15 Novanm toujou nan Kingston. Abit la distribue 21 katon jò n pandan rankont la.

Asamoah Gyan make 2 gòl pou ede Gana tronse Kore du Sud 3 a 1 nan kad yon match chofe jarèt ki jwe nan Sewoul. Mitan teren Chelsea a Michael Essien make yon gòl nan viktwa a. Kore du Sud pat gen sèvis 3 vedèt kap jwe nan lig football Angle a.

D-C United tonbe 2 a 1 devan New England Revolution Samdi isit Washington. Chivas USA kalifye pou faz final la malgre defèt 2 a 1 yo subi Kansas City Wizards. Colorado Rapids fè match nul 1 a 1 ak New York Redbulls.

Nijerya kontinye ap domine match kalifikatif koup dAfrik dè Nasyon an apre viktwa 1 a 0 yo ranpòte devan Lesotho nan Maseru. Nijer ak Uganda fè match nul 0 a 0. Pwochen rankont yo ap jwe an Mas. Venkè chak group ak 3 meyè 2 zièm yo pral rejwen Gana pou koup dAfrik dè Nasyon an Janvye 2008. Nan lòt Kot Divwa bimen Gabon 5 a 0. Burundi woule Mauritani 3 a 1. Liberya te fè anpil efò avan li kale Wanda 3 a 2. Angola ranpòte yon bèl viktwa 3 a 1 devan Kenya. Tanzani fè match nul 0 a 0 ak Mozambik. Aljeri ranpòte yon viktwa tou mens 1 a 0 devan Gambi. Menm situasyon an pou Mali ki kale Togo 1 a 0. Benin danse sou Sierra Leone 2 a 0. Afrik du Sud, ke Brezilyen Carlos Alberto Parreira ap antrene, ranpòte yon viktwa tou mens devan Zambi 1 a 0 epi Republik Kongo pilon-nen Chad 3 a 1.

O Meksik Francisco Fonseca, kap jwe nan Benfica de Lisbon kore Hugo Sanchez pou l ta vinn antrenè seleksyon an apre revokasyon Arjanten Lavolpe.

Adolesan Arjanten Gonzalo Higuain make 2 gòl nan viktwa 3 a 1 River Plate ranpòte devan Archirival yo Boca Junior.

Gadyen seleksyon franse a Gregory Coupet ap rate match kalifikatif koup dEròp dè Nasyon la Frans gen pou jwe kont Il Feroe yo Mèkredi akoz yon blesu. Nan koup dEròp dè Nasyon Espay tonbe devan la Swèd 2 a 0 pandan ke la Frans fè yon fo pa devan la Ekòs 1 a 0. Masedwa n kenbe Angletè an echèk ak yon nul 0 a 0. Itali pilon-nen Ukrèn 2 a 0. Slovaki krabinen peyi dè Gal 5 a 1. La Oland fè match nul 1 a 1 ak Bulgari, la Grès ranpòte yon viktwa tou mens devan la Nòvèj 1 a 0.

Medya Chinwa yo anonse veteran football Sèb Ratomir Dujkovic nonmen nan tèt seleksyon nasyonal la pou je zolenpik 2008 yo. Dujkovic, ki te ede Gana kalifye pou 8 tièm de final koup du mond FIFA Almay 2006 la,kapab siyen kontra a semen pwochè nan juskavan match amikal la Chin gen pou jwe kont Japon 25 Oktòb nan vil Tokyo. Federasyon Football Swedwa a anonse mitan teren seleksyon an Fredrik Ljungberg ap rate match kalifikatif koup dEròp nasyon an Mèkredi kont Island akoz yon blesu. Gen 3 lòt jwè kap rate rankont la swa akoz kumulasyon katon jòn ou byen pou rezon pèsonèl.

Chikago kontinye ap byen men-nen nan lig la apre yo demoli Buffalo Bills 40 a 7 yè Dimanch la pou mete rekò yo ak 5 viktwa kont 0 defèt. Indianapolis Colt gen menm rekò a apre yo remonte yon defisi 13 pwen pou kale Tennessee Titans 14 a 13. Filadelfia Eagles suprann Dallas Cowboys 38 a 24. Washington Redskins tonbe devan New York Giants 19 a 3 epi Aswè a Denver Broncos ap akeyi Baltimore Ravens.

Atletisme

Etyopyen Teferi Wodajo ranpòte maraton Kolòy la an 2 zhè-11 minit-18 sekond. Alman Muminita Zaituc ranpòte kategori feminen an. devan Chinwa Sun Weiwei ak Rus Yelena Tichonova.

Kourè Olandè, dorijin Kenya, Lornah Kiplagat bat yon rekò nan semi maraton kous mondyal ki tap dewoule nan Debrecen nan Ongri. Eritreyen Zersenay Tadesse ranpòte kategori maskulen an.

Numewo 1 tenis mondyal maskulen an Swis Roger Federer te bezwen 2 manch 6-3, 6-3 pou l kale Britanik Tim Henman e ranpòte tounwa tenis Japonè a. Franse Marion Bartoli remonte yon defisi pou l kale Japonè Aiko Nakamura 2-6,6-2,6-2 pou l ranpòte kategori feminen an.

Sèb Novak Djokovic ranpòte tounwa tenis Metz la devan Otrichyen Jurgen Melzer 4-6, 6-3, 6-2.Rus Nadia Petrova ranpòte tounwa tenis Porsche Grand Prix a ki tap dewoule nan Stuttgart an Almay. Petrova te bezwen 2 manch pou l kale franse Tatiana Golovin 6-3, 7-6 pou l ranpòte 5 kièm tit nan karyè l. Chinwa Sun Tiantian ranpòte premye tounwa tenis pwofesyonèl nan karyè l gras ak ak 2 kout rakèt li pase Uzbèk Iroda Tulyaganova 6-2 , 6-4 nan tounwa Open Uzbekistan an.

Boks

Rus Nikolai Valuev defann ak suksè tit Asosyasyon Mondyal Boks la kategori pwa lou devan ameriken Monte Barrett. Nikolay voye advèsè a 2 fwa sou tapi a juskaske antrenè Barret antre sou ring pou sispann match la pou sove la vi boksè ameriken an.

XS
SM
MD
LG