Accessibility links

Kar de Final KONKAKAF la Kòmanse


Football

Nan Konkakaf la New England Revolution fè match nul 0 a 0 ak klub Kosta Riken LD Alajuelense nan kar de final konpetisyon an ki tap dewoule nan Hamilton an Bermud. Jodi a Los Anjeles Galaksi ap prepare pou rankontre ak Deportivo Saprissa nan Kalifòni. Jodi-a seleksyon mwens de 23 zan Jamayiken an ap rankontre ak New England Revolution nan yon match amikal chofe jarèt avan yo rankontre ak Bermud Samdi

Klub football alman Werder de Brem make yon gòl pandan arè de je yo pou l kale Juventus de Turen 3 a 2 nan kad 8 tièm de final ale Lig dè Chanpyon Europeyen an. Nan lòt rankont Milan AC kenbe Ajax Amsterdam an echèk 2 a 2. Glasgow Rangers fè match nul ak Villareal 2 a 2. Barselòn tronse Chelsea 2 a 1. Match retou a fikse pou 2 semen ak venkè yo kap kalifye pou kar de final la. Final la fikse pou 17 Me nan stad de Frans la an deyò vil Paris.

16 zièm de final Koup UEFA a ap demare jodi a lak patisipasyon 4 klub franse. La Frans publiye lis jwè ki pral patisipe nan match amikal ak Slovaki 1 Mas. Etazuni publiye lis jwè ki pral patisipe nan match amikal kont la Polòy an Almay pami 22 seleksyone yo nou jwen 11 jwè ka evolye sou kontinan Europeyen an.

NBA

Steve Francis ap kite Orlando Majik pou l al jwe nan New York Knicks an echanj pou Trevor Ariza ak Anfernee Hardaway. Aswè Indiana Pacers pral lakay Detroit Pistons epi Sakramento Kings ap fè yon kout pye lakay Los Anjeles Lakers. Match sa yo nou kapab gade yo nan televizyon.

Tennis

Tchèk Radek Stepanek kalifye pou kar de final tounwa tenis ABN nan kap dewoule nan Rotterdam apre li kale franse Fabrice Santoro 6-4, 6-1. Italyen Daniele Bracciali kalifye tou apre li pase espayòl Alex Calatrava 3 kout rakèt 4-6, 6-2, 7-6 pou l al rankontre ak Rus Nikolay Davydenko. Franse Olivier Patience suprann Arjanten Gaston Gaudio pou l kalifye nan 2 zièm tou tounwa tenis Open Brezil la kap dewoule nan Sao Paolo.

XS
SM
MD
LG