Accessibility links

Breaking News

La Polis o Brezil Libere Ansyen Footbalè Arjanten Diego Maradona


Brezil / Maradona

La polis nan Rio de Janeiro o Brezil libere ansyen footballè arjanten Diego Maradona apre yo te mete l anba kòd pou deblozaj li te pete nan ayeropò a. Arestasyon an fèt apre vedèt la te rate avyon an nan moman li tap retounen nan peyi l . Maradona te rive nan Rio de Janeior pou l patisipe nan yon match de charite Zico te òganize. Maradona ta kapab pase 2 zan prizon si otorite yo te trennen devan la justis.

Atakan brezilyen Adriano kap jwe nan Inter de Milan ap pase tout jounen jedi a nan lopital apre chok li te resevwa nan vikwa 4 a 1 Inter sot ranpòte devan Empoli. Adriano ranvwaye vwayaj li ta pral fè o Brezil kote li ta pral pase fèt fen ane a.

Atakan seleksyon Brezil la, Ronaldo, mande koekipye Real Madrid yo pou uni yo aprè defèt 2 a 1 yo subi sou pwop̀ teren yo devan Racing Santander Mèkredi swa. Defèt sa a lage madrilèn yo an 5 kièm pozisyon nan lig la swa 11 pwen dèyè FC Barselòn ki nan tèt klasman jeneral la. Ronaldo bay fanatik yo garanti li pap abandone ekip la kap monte yon maswife nan chanpyona premyè divizyon Espayòl la.

Yon lòt kote yon tribunal Afè Sosyal Franse nan vil Lyon rejte toute demand madan footbalè Kamerounè Marc Vivien Foé ki te mouri pandan yon rankont Kameroun tap jwe ak Kolonbi pandan dewoulman koup Konfederasyon an an lan 2003. Madan Foé te mande tribunal la pou l rekonèt klub franse Lyon te anplwaye mari l pa konsekan li dwe benefisye asistans sosyal. Avoka yo pwomèt pou ale an apèl ak desizyon tribunal la.

Footbalè Kamerounè, Samuel Eto’o, poko deside si wi ou non li pral patisipe nan Koup dAfrik dè Nasyon an kap kòmanse an Ejipt 20 Janvye 2006. Eto’o, ki te finalis pou pri meyè jwè FIFA pou ane a, fè konnen li gen tan devann pou l deside.

Yon komisyon kap ankete sou kontra antrenè seleksyon Hongri a Lothar Matthaus dekouvri antrenè resevwa pi fò lajan kontra a yon fason ilegal. Dapre tèrm kontra a Matthaus ta dwe touche plis pase 100 mil dola par an. Selon rapò a federasyon deklare yon fraksyon salè a. Pandan 2 zan kontra a Mattaus resevwa plis pase 1 milyon dola kont plis pase 200 mil responsab yo deklare.

Antrenè seleksyon nasyonal feminen ameriken an Greg Ryan anonse lis 28 jwè li konvoke nan seyans dantrenman nan kad preparatif kwadrangulè ki pral dewoule mwa pwochen an soti 18 pou rive 22 Janvye an Chin. Antrenè a ap seleksyone 20 jwè nan lis pou tounwa a kap gen ladann la Frans, la Chin, Norvèj. Tounwa sa a konsidere kòm yon tounwa preparasyon pou koup du mond ki gen pou dewoule an Chin an lan 2007.

Atletisme

Meday de Bronz Brezilyen Vanderlei Cordeiro de Lima anonse patisipasyonn nan kous tradisyonèl Saint-Sylvestre la ki dewoule nan Sao Paolo 31 Desanmǹ.

Komite Olenpik Jamayiken an ap rann omaj pou Atlèt Merlene Ottey ki reprezante peyi a nan 7 je zolenpik lè yap erije yon gwo statu an bronz ki mezure 2 mèt 40. Ottey, ki te reprezante Sloveni nan Je zolenpik Atèn 2004 yo, ranpòte 8 meday pandan 6 je zolenpik li reprezante Jamayik. Ottey, ki gen 45 kan, te ranpòte premye meday li pou Jamayik nan Je zolenpik Moskou yo an 1980. Seremoni an ap dewoule 28 Desanm.

NBA

Vince Carter make 32 pwen pandan Richard Jefferson ajoute 18 nan viktwa 96 a 85 New Jersey Nets ranpòte devan Orlando Majik. Philadelphia 76ers te fè anpil efò pou l kale Golden State Warriors 111 a 110. San Antonio Spurs amelyore pèfòmans li ak 20 viktwa 6 defèt apre viktwa 109 a 96 yo ranpòte devan New York Knicks. Washington Wizards mete fen nan 6 defèt li subi an deplasman gras ak yon swif 116 a 110 li pase Denver Nuggets. Toronto Raptors te fè anpil efò pou l kale Houston Rockets 94 a 81. Portland Trailblazers tonbe devan Memphis Grizzlies 89 a 79. Minnesota Timberwolves pat bay New Orleans Hornets oken chans nan viktwa 88 a 69. Indiana Pacers tronse Los Anjeles Clippers ak yon viktwa 97 a 75. Boston Celtics pilon-nen Utah Jazz 101 a 89.

Football Ameriken

Indianapolis Colts gen 7 jwè kap patisipe nan rankont tout vedèt ki genpou jwe nan Honolulu.San Diego Chargers gen 6 jwè ansanm ak Chikago Bears ak Atlanta Falcons. Washington Redskin gen 2 jwè. Gen yon total 42 jwè ki seleksyone pou l al patisipe nan banbòch la kap dewoule apre final 40 tièm edisyon Superbowl la.

Klike sou ralonj ki anlhè atik sa a pou n tande Dosye Spò

XS
SM
MD
LG