Accessibility links

Breaking News

Nan Pòtoprens, Gouvènman an Mande L'ONU ak PNH Travay Plis Pou Garanti Sekirite Eleksyon yo


Men yon lòsyè nan nouvèl ki domine aktyalite a nan peyi d Ayiti soti lendi 5 pou rive madi 6 desanm 2005 la:

Premye Minis Gérard Latortue retounen apre yon vwayaj aletranje, pi presizeman nan Ewòp ak Etazini e youn nan premye deklarasyon li fè se mande plis sekirite pou eleksyon yo ka dewoule san pwoblèm. Korespondan nou nan Pòtoprens Rotchild François, Jr. di nou dosye sekirite eleksyon yo se sèl tèm ki pral sou tapi a nan rankont Chèf Gouvènman an fè chak madi ak responsab misyon L'ONU an (MINUSTAH) e Polis Nasyonal Ayiti a (PNH).

Pandansetan, operasyon distribisyon kat elektoral yo ap kontinye, tanto ak difikilte, tanto san pwoblèm. Antouka pou Konseye Elektoral Louis Gerson Richemé, KEP a satisfè pou jan distribisyon an ap mache jiskaprezan. Yon lòt manm Konsèy la (Pierre-Richard Duchemin) te deklare anvan sa ke KEP a ka pran jiska samdi 7 janvye, kididonk lavèy eleksyon yo, pou li fin remèt tout kat elektoral yo. Yon lòt kote, korespondan nou Renan Toussaint di se sèl pati politik Samir Mourra a (Mobilizasyon pou Pwogrè Ayiti, MPH) ki deja remèt KEP a minimum 40 mil non li reklame anvan li bay pati yo asistans finansye gouvènman an pwomèt la, swa anviwon 36 mil dola ameriken. Mourra, ki pa menm gen dwa kandida alaprezidans poutèt li gen paspò ameriken, ta bay jiska 52 mil non ki verifyab.

Pwoblèm lajan ak mekontantman pou fason eleksyon yo òganize lakòz plizyè kandida lakomin nan Latibonit kraz'on kite sa. Duc Jonathan Joseph gen detay.

Nan Depatman Nòdès, anplwaye Biwo Elektoral Kominal yo (BEC) menase pou yo fè grèv paske yo pa touche. Yvan Martin Jasmin di nou se pwen sa a, ak distribisyon kat elektoral yo, k'ap fè nouvèl nan rejyon Nò a.

Si ou vle tande tout repòtaj sa yo an detay, fè klik sou ralonj ki anlè foto a.

XS
SM
MD
LG