Accessibility links

Kosta Rika Tonbe Devan la Frans


La Frans remonte yon defisi pou l kale Kosta Rika 3 a 2 nan okazyon yon match chofe jarèt ki jwe ant 2 seleksyon yo nan Martinik-nan kad preparatif pou faz final koup du mond Almay 2006 la apre premye mitan an te fini 2 a 0 an favè seleksyon Kosta Rika a.

FIFA pase lòd pou match kalifikatif de baraj ale ant Ostrali ak Urugwe jwe a 9 du swa nan Montevideo nan yon efò pou pèmèt Ostralyen repoze yo avan match retou a ki gen pou dewoule nan an Ostrali. Venkè rankont la ap kalifye pou faz final koup du mond Almay 2006 la.

Footbalè Brezilyen Ronaldo naturalize sitwayen espayòl--desizyon ki louvri wout la pou Real Madrid ajoute yon lòt footbalè etranje nan klub la--Real gen opsyon pou l siyen yon kontra ak defansè Sao Paulo Cicinho. Ronaldo se 2 zièm jwè Real Madrid ki naturalize espayòl apre Roberto Carlos. Real Madrid siyen yon kontra ak otorite chinwa pou l ede devlope klub footbal chinwa Guoan.

Defansè Colonbus Crew Robin Fraser pran retrèt li nan lig football balonwon ameriken apre li pase 10 zan ap jwe nan lig la. Msye jwe 27 rankont pou seleksyon nasyonal ameriken an.

Footbalè seleksyon Angle a kapab resevwa anviwon 500 mil dola si yo ranpòte koup du mond Almay 2006 la. Anons sa- a fèt nan moman seleksyon angle a ap pare pou l jwe yon match amikal chofe jarèt kont Arjantin Samdi nan vil Jenèv.

Tennis

Numewo 1 tenis mondyal maskulen an Swis Roger Federer figure nan menm group ak arjanten Guillermo Coria ak David Nalbadian nan dènye tounwa tenis dè mèt kap dewoule nan Shangai an Chin pou group wouj la. Chanpyon Roland Garos la Rafael Nadal figure nan group dò a ak ameriken Andre Agassi, Nikolay Davidenko ak Gaston Gaudio. 2 premye nan chak group ap kalifye pou semi final la.

Franse Amelie Mauresmo kale Belj Kim Clijsters nan premye tou tounwa Asosyasyon Tenis Pwofesyonèl la kap dewoule nan los Anjeles 6-5, 6-3, 7-6--defèt la afekte chans Clijsters genyen pou l kalifye nan semi final la. Ameriken Lindsay Davenport kale Swis Patty Schnyder 6-3, 7-5. Franse Marie Pierce te bezwen 2 kout rakèt pou l kale Rus Elena Dementieva 6-2, 6-3.

NBA

Ron Artest make 24 pwen pou ede Indiana Pacers ranpòte yon viktwa tou mens devan Miami Heat 95 a 90 yè swa. Nan Boston Ricky Davis make 2 pwen kèk sekont avan fen tan reglemantè a pou pèmèt Celtics yo ranpòte yon viktwa de justès 99 a 98 devan Memphis Grizzlies. Lebron James make 31 pwen pou ede Cleveland Cavaliers danse sou Seattle Supersonis 112 a 85. Nan lòt rankont Tim Duncan make 29 pwen-franse Tony Parker ajoute 23 pwen pou ede chanpyon sòtan San Antonio Spurs kale Charlotte Bocats 94 a 86. Washington Wizards tonbe devan Los Anjeles Clippers 102 a 97. Minnesota Timberwolves woule Los Anjeles Lakers 88 a 74. New York Knicks kontinye ap penyen lage nan lig la apre yo tonbe devan Portland Trail Blazers 95 a 83. Orlando Majic ranpòte yon viktwa tou mens devan New Orleans Hornets 88 a 83. Chikago Bulls suprann Golden State Warriors 85 a 84 pandan ke Denver Nuggets pat rankontre oken difikilte pou l kale Sakramento Kings 107 a 91.

US / SPORTS

Gouvènman ameriken an rann omaj 14 moun pami yo boksè lejandè Muhammad Ali ki resevwa meday Libète Prezidansyèl la nan yon seremoni ki dewoule nan la Mezon Blanch yè Madi a.

Je Zolenpik

Òganizatè Je zolenpik divè Turen yo anonse plan pou je yo pa afekte anviwonman an. Nan rankont Pwogram Nasyonzuni sou anviwonman fè nan Nairobi-Kenya òganizatè yo di kontwole emisyon di-oksid de kabò se pi gwo priyorite yo bay tèt pandan dewoulman konpetisyon an soti 10 pou rive 26 Fevriye 2006.

XS
SM
MD
LG