Accessibility links

Chikago Fire Kalifye pou Faz Final Chanpyona Ameriken an


Football

Chikago Fire kalifye pou faz final chanpyona lig football balonwon ameriken an apre yo fè match nul 2 a 2 ak Metro Stars. Kolonbus Crew elimine nan kous la apre yo tonbe 2 a 1 devan F-C Dallas. D-C United danse sou Real Salt Lake ak yon viktwa 3 a 1. Freddy Adu bat defans la pou l make youn pami gòl yo. Kolorado Rapids fè match nul 1 a 1 ak Chivas USA. Fabrice Noel jwe 9 minit nan rankont la apre li ranplase Jean Philippe Peguerro nan fen 2 zièm mitan an.

Samdi kap vini la a anviwon 40 match kalifikatif koup du mond Almay 2006 ap dewoule sou tout planèt ak posibilite pou anviwon 15 ekip jwen tikè yo pou faz final la. Yon viktwa la Frans kont la Swis pa ekzanp ap pèmèt franse yo jwen tikè yo. Gen 10 peyi ki deja gen tikè yo an plis de Almay kap òganize konpetisyon an. . La oland, Portugal, Itali, Ekwatè, Togo, Gana ak Turki kapab kalifye si yo ranpòte la viktwa Samdi. Senegal ak Kot Divwar non sèlman dwe ranpòte rankont la men tou espere ke lòt ekip advès pèdu rankont yap jwe a. .

Sou kontinan Europeyen an 7 peyi kapab kalifye. Nan Amerik du Sud la Brezil ak Arjantin deja kalifye men Ekwatè dwe evite yon defèt si l vle rete nan kous la san bliye Paragwe dwe ranpòte yon viktwa lè lap rankontre ak Venezuela. An Afrik Angola kapab tou kalifye si l kale Rwanda. Nan Konkakaf la Etazuni ak Meksik deja gen tikè yo men Kosta Rika ak Gwatemala gen desten yo nan men yo swa pou kalifye dirèkteman ou byen kalifye pou jwe yon match de baraj kont Baren ou byen Uzbekistan. 2 ekip yo ap tope kòn yo Samdi nan Kosta Rika.

Patizan de Belgrad nonmen alman Juergen Rober kòm antrenè ekip la. Desizyon sa a pran apre defèt 5 a 2 klub la subi devan klub Izrayelyen Maccabi Petach Tikva. Klub Italyen Milan A C ap etudyen posibilite pou l konstrui yon nouvo stad pou l sispann pataje stad San Siro a avek Inter de Milan, dapre nouvèl ki publiye nan jounal spòtif Corriere de la Sera. Komisyon de disiplin Unyon Football Europeyen kapab pran sanksyon kont Bayern de Munick apre li refuze kouvri non konpayi asurans ki patwone ekip la. Règleman yo entèdi klub yo fè publisite pou kooperasyon ki patwone ekip yo pandan yon rankont Unyon Football Europeyen an.

Cyclisme

Unyon Siklis Entènasyonal la non-mnen yon avoka espesyal pou ankete sou akuzasyon kap peze sou siklis ameriken Lance Armstrong kòm kwa li ta konsome dròg pandan kous bisiklèt Tour de Frans la an 1999-- yon akuzasyon Armstrong pa sispann rejte.

Tribunal Abritraj Spòtif la nan vil Lauzanne an Swis di li espere disi fen ane a lap pran yon desizyon sou apèl siklis ameriken Tyler Hamilton te fè sou suspansyon dopaj lap purje apre Je zolenpik Atèn 2004 yo. Mwa pase a responsab yo te suspann yon depozisyon ki tap fèt sou dosye a apre pati konsène a pat kapab founi tout prèv sou inosans li.

Tennis

Jwè tenis arjanten Mariano Puerta, ki anba akuzasyon kòm kwa li ta teste pozitif pandan final tounwa tenis Roland Garos la, elimine nan tounwa tenis AIG a kap dewoule nan vil Tokyo o Japon. Mariano fè bèk atè devan Chipriyòt Marcos Baghdatis 6-2, 6-7, 7-5. Jwè tenis Rus Ekaterina Bychkova ak Italyen Maria Elena Camerin kalifye pou kar de final tounwa tenis Open Uzbekistan an.

Numewo 1 tenis mondyal feminen an ameriken Lindsay Davenport kalifye pou kar de final tounwa tenis Filderstad la an Almay apre li pase Italyen Francesca Schiavone 2 kout rakèt 6-2, 6-2 pou l al rankontre ak chanpyon Roland Garos la Anastasia Myskina ki elimine konpatriòt li Dinara Safina 7-6, 6-7, 7-5.. Slokak Daniela Hantuchova elimine Swis Patty Schnyder 6-4, 6-3 pou l al rankontre ak Italyen Flavia Pannetta ki suprann bonanj Bèlj Justine Henin-Hardenne 6-4, 6-3.

Slovak Dominik Hrbaty kalifye pou kar de finaltounwa tenis Moselle la kap dewoule nan Metz an Frans apre li pase sou alman Florian Mayer 7-6, 6-1. Franse Paul Mathieu, Arnaud Clement, Ostralyen Peter Luck kalifye pou kar de final la. Venkè a ap foure nan pòch li plis pase 52 mil dola.

Patinaj Atistik

Patinè atistik ameriken Michelle Kwan ki chanpyon du mond 5 fwa, abandone ouvètu sezon classic entènasyonal Campbell la akoz yon dechirur nan hanch li. Manmzèl ap rate tou konpetisyon ki gen pou dewoule nan New Jersey soti 20 pou rive 23 Oktòb. Manmzèl espere patisipe nan konpetisyon ki gen pou dewoule nan vil Peken an Chin mwa pwochen an.

XS
SM
MD
LG