Accessibility links

Plizyè Milye Sòlda Gàd Nasyonal Etazini Ap Distribye Manje ak Materyel Sekou Nan Eta Katrina Devaste yo


Dè milye sòlda Gàd Nasyonal Etazini an rive nan Nouvelle-Orléans

kote yo pote asistans bay plizyè dizèn milye viktim siklòn Katrina kite nan 3 Eta sou kòt Sidès Lèzetazini an: Louisiane, Alabama ak Mississippi, lendi 29 Out la. Twoup yo tou evakye nan lòt Eta vwanzen tankou Texas plis pase 20 mil moun malad, epize e dezespere ki tap tann èd depi 4 jou nan men otorite lokal e federal yo.

Viktim ouragan an kritike ak fòs otorite Washington yo pou yo fason yo reyaji devan katastwòf la, men depi vandredi situasyon an piti-piti koumanse chanje pou sinistre yo. 30 mil sòlda ap asisre livrezon materyèl sekou yo e mentni lòd nan Louisiane, Alabama, Mississippi ak nan Eta Floride. Prezidan George W. Bush rekonèt operasyon sekou yo pat dewoule ditou kòmsadwa. Li vizite vandredi zòn dezas la. Li wè dife kap boule san kontwòl nan Nouvelle-Orléans, kote makèt, otèl ki inonde ak lòt antrepriz moun piye pou yo pa mouri grangou, pou yo suviv... Prezidan Bush rankontre majistra kominal vil Novelle-Orléans, Ray Nagin, ki pat kache mekontantman li vizavi otorite federal yo ki te pran anpil tan anvan yo depeche sekouris pou vinn ede "refijye" Katrina yo.

Majistra Nagin di li soulaje deske vizit msye Bush fè nan vil li a vinn atire atansyon sou pwoblèm Nouvelle-Orleans ap konfwonte depi 5 jou yo. Kongrè Ameriken an apwouve yon plan asistans prese-prese 10.5 milya dola afavè Eta devaste yo. Msye Bush di lajan sa a se sèlman yon avalwa sou sòm lajan ki pral nesesè pou ede viktim yo ak Eta ravaje yo rekanpe sou pye yo. Prezidan Bush di bagay yo pa tap mache byen nan Nouvelle-Orléans...li pral fè yo mache byen kounye a.

NB: Ale sou lyen anlè atik sa a si'w ta renmen koute devlopman nouvèl ki fe aktyalite a an'n Ayiti pou vandredi 2 septanm nan.

XS
SM
MD
LG