Accessibility links

Breaking News

Spò Aktyalite 7/21/05


Tour de France

Siklis Espayòl Marcos Serrano ranpòte 18 tièm etap Tour de Frans la ki kouvri yon distans 189 kilomèt. Ameriken Lance Armstrong, kap chache yon 7 tièm tit afile, toujou nan tèt klasman jeneral la ak 2 minit 46 sekond nan moman manke 3 jou pou kous la fini.

Football

Mitan teren seleksyon Pòtugal la Luis Figo kap jwe nan Real Madrid kapab transfere al jwe nan Inter de Milan dapre jounal Italyen Gazzeta dello Sport a Inter rive jwen yon klub pou 2 mitan teren Olandè a Edgar DAvis ak Andy van der Meyde. Gen negosyasyon kap fèt pou 2 mesye yo al jwe nan Everton epi louvri pòt la pou Luis Figo transfere soti nan Real Madrid pou l ale nan Inter de Milan. Figo te touche plis pase 145 mil dola la par semen nan Real Madrid sezon pase a.

Semi final koup dò KONAKAF la ap demare aswè a nan Giant Stadium nan New York/ New Jersey. Etazuni ap rankontre ak Onduras epi Kolonbi pral mate balon fas a Panama. Final la fikse pou Dimanch toujou nan Giant Stadium nan.

Etwal Wouj de Belgrad anplwaye yon antrenè etranje pou la premyè fwa nan 60 tan istwa klub la. Italyen Walter Zenga siyen yon kontra 2 zan pou l pran tèt ekip la. Zenga te revoke mwa Avril pase a kòm antrenè Steaua Bucharest malgre li mennen klub la nan tèt chanpyona a.

Tennis

Jwè tenis Arjanten Mariano Puerta kalifye pou kar de final tounwa tenis La Oland apre li elimine Kosta Riken Antonio Marin an 2 manch 6-2, 6-2. Puerta pral rankontre ak Tchèk Ivo Minar ki elimine Espayòl Santiago Ventura 7-6, 6-4. Pita nan jounen an chilyen Fernando Gonzalez fas a Tchèk Robin Vik epi Olandè Raemon Sluiter fas a Italyen Daniele Bracciali.

NBA

Flip Saunders jwen yon akò pou l tounen nouvo antrenè ekip basketball ameriken Detroit Pistons. Saunders, ki te konn antrene Minnesota Timberwolves ap ranplase Lary Brown, ap touche ant 4 a 5 milyon dola par sezon. Responsab yo ap konfime nouvèl la jodi a pandan yon konferans de près.

Natation

Najè ameriken Chip Peterson ranpòte premye meday dò l nan chanpyona mondyal natasyon kap dewoule nan Montreal Kanada nan kous 10 kilomèt.

CAS

Tribunal Abritraj la nan vil Lauzann an Swis deside ekip relè mil 600 mèt ameriken kapab konsève meday dò yo te ranpòte pandan je zolenpik Sidne 2000 yo. Tribunal la pwononse l an favè komite Olenpik ameriken an ki te ale an apèl apre Komite Olenpik Entènasyonal la te menase pou l pran meday dò a nan men Michael Johnson ak rès ekip akoz youn nan manb ekip la, Jerome Young, te teste pozitif pou steroyid an 1999. Tribunal la di règleman ki te an vigè nan periòd la pat mande yon entèdiksyon jeneral pou tout ekip la men sèlman atlèt ki komèt enfraksyon an dwe pèdu meday li te ranpòte a.

Tennis

Adolesan Izrayelyen Shahar Peer remonte yon defisi pou l elimine Japonè Ai Sugiyama 5-7, 7-6, 6-4 pou kalifye nan pwochen tou tounwa tenis feminen Cincinnati a. Sud Koreyen Cho Yoon-jeong elimine Rus Tatiana Panova 6-7, 6-2, 6-2 malgre chalè ak yon pwoblèm nan do.

Alman Nicolas Kiefer kalifye pou 3 zièm tou tounwa tenis Indianapolis la apre li elimine Franse Antony Dupuis 7-5, 6-4. Slovak Dominik Hrbaty fè malèt li apre swis George Bastl te ba l 3 kout rakèt 6-4, 6-7, 6-4. Ameriken Paul Goldstein suprann bonanj Belarus Max Mirnyi 0-6, 6-3, 6-3.

Chanpyon an tit tounwa tenis Palerme nan Anabel Medina Garrigues elimine konpatriòt li espayòl Conchita Martinez Granados 7-5, 6-2 pou l kalifye pou kar de final tounwa tenis Palerme nan kap dewoule nan Cisil an Itali.

Klike sou ralonj ki anlè paj sa a pou tande repòtaj espesyal pou jodi a.

XS
SM
MD
LG