Accessibility links

Breaking News

Spò Aktyalite 5/17/05


NBA

5 kièm rankont seri Semi final NBA a ap rapousib jodi a ak 2 rankont enpòtan. Nan Konferans de Lès la chanpyon sòtan an Detroit Pistons ap rankontre ak Indiana Pacers nan yon 5 kièm rankont kote 2 belijeran yo a egalite 2 viktwa patou. Venkè seri a ap rankontre ak Miami Heat nan final rejyonal la. Menm situasyon an pou San Antonio Spurs ki gen pou rankontre ak Seattle Supersonics--kote 2 ekip yo a egalite. Demen Mèkredi a Phoenix Suns pral mate balon fas a Dallas Mavericks.

Asosyasyon Basketball Chinwa a di yo espere Yao Ming kap jwe nan Houston Rockets ap jwe nan seleksyon chinwa ki pral patisipe nan chanpyona basketball Azyatik la kap kòmanse an Septanb.

Football

Antrenè seleksyon football ameriken an Bruce Arena publiye lis jwè ki pral reprezante Etazuni fas a Angletè 28 Me kap vini la a nan okazyon yon match amikal chofe jarèt kap jwe nan Chikago. Pami 19 jwè Bruce Arena konvoke nou jwen 10 pami yo ap evolye nan chanpyona Europeyen an. Angletè gen pou rankontre ak Kolonbi 3 jou apre rankont la.

Antrenè seleksyon kadè ayisyen an, Jean Yves Labaze publiye lis 19 jwè ki pral reprezante Ayiti nan kwadrangulè final eliminatwa koup du mond Kadè ki gen pou dewoule O Meksik. Peterson Occenat, Symson Exume, Philippe Barthelemy, Vaniel Sirin, Adiet Maddy, Cervilus Evins, Marc Andre Jean Baptiste, Djery Djenad Caprice, Johnny Exantus, Brisly Renaud, Sony Norde, Peterson Espera, Harold Julmiste, Vinsly Philistin, Alfred Robenson, Jeff Bourdeau, Josue Jean-Pierre, Richecarde Theodore. Ayiti ap jwe premye rankont li aswè a fas a Meksik.

Otorite FIFA yo gen juska Septanb pou aksepte règleman global anti dopaj la sinon yap eksklu yo nan mouvman olenpik la. FIFA vle pou footballè yo subi yon suspansyon 6 mwa olye de 2 zan komite olenpik la enpoze kont tout atlèt ki teste pozitif pou uzaj anabolizan. Menm lè òganizasyon Mondyal Anti Dopaj la pa kapab pran sanksyon kont FIFA kòm òganizasyon men li kapab rekòmande sanksyon kont gouvènman yo ak asosyasyon peyi manb yo--aksyon ki kapab afekte konpetisyon FIFA ap òganize nan yon peyi.

Tennis

Swis Roger Federer ki ranpòte 3 tounwa tenis Gran Shelem pou sezon 2004 la resevwa pri Laureus Mondyal la kòm meyè spòtif pou ane a. Federer ranmase plis vwa ke najè ameriken Michael Phelps ki te ranpòte 6 meday dò nan je zolenpik Atè n 2004 la, Maroken Hicham El Geurrouj, ak siklis ameriken Lance Armstrong. Seleksyon football Grès la ki te ranpòte koup dEuròp dè nasyon an, ranpòte meyè ekip pou ane a . Atlèt Chinwa Liu Xiang non-men kòm nouvo venu pou ane a.

Responsab tenis ameriken anonse yap chanje koulè teren kote tounwa tenis US Open nan ap dewoule. Teren an ap ble olye de vèr pou pèmèt fanatik yo wè balon an pi byen. Tonwa US Open nan ap demare soti 29 Out pou l fini 11 Septanb.

XS
SM
MD
LG