Accessibility links

Breaking News

Dosye Ayiti-Eleksyon: KEP a Bezwen Fon Pou Li Motive Popilasyon an


Men senk pwen ki ap fè aktyalite nan peyi d Ayiti maten madi 10 me 2005 la:

Konsèy Elektoral la plenyen daprèzavwa li pa resevwa nan men Pwogram Nasyonzini pou Devlòpman fon ki nesesè pou l’ fè kanpay motivasyon ak sansibilizasyon pou eleksyon yo. Yon korespondans Jn-Pierre Leroy, depi Pòtoprens.

Malgre pwoblèm lajan Konsèy Elektoral la genyen, responsab yo ap byen mennen operasyon enskripsyon elektè yo nan depatman Latibonit, kote korespondan nou se Duc Jonathan Joseph.

Toujou sou dosye eleksyon ki fikse pou fen ane a nan peyi d Ayiti, yon gwoup patizan Duvalyeris rasanble nan eta Florid pou yo diskite sou pwoblèm peyi a ak strateji yo nan kad pwochen vòt la. Sepandan, Yves Mompremier di nou sanble gen yon divizyon ant moun ki soti nan rejim Papa Doc Duvalier ak sila yo ki revandike doktrin pitit defen diktatè a, Jean-Claude Duvalier.

N' ap retounen Pòtoprens kote fenomèn ensekirite a kontinye bay kè-sote. Renan Toussaint, ki sou plas, di nou, antwòt, MINUSTAH ak lapolis toujou pa kapab kontwole katye cho yo, pa egzanp Bel-Air, Delmas 2 elatriye. Gen nouvèl ki di kèk nan ravisè yo ta twouve yo tou pami moun kap fè revandikasyon politik nan katye sa yo.

Anfen, yon kòmandan militè demobilize nan peyi Dayiti fè konnen se pa otorite yo ki te arete l’, kontrèman ak sa laprès te anonse sa gen kèk jou. Jn-Christophe Collègue k' ap suiv dosye sa a nan vil Mirebalais, nan Plato Santral la, rapòte deklarasyon Kòmandan E. Philippe te fè nan yon konferans-pou-laprès, an prezans sòlda MINUSTAH, kote li di se yon ansyen militè ki te met' men sou li pou yon kesyon dwòg militè sa a te vle pran ilegalman. Jiskaprezan, Msye Philippe anba men twoup L'ONU yo.

Si ou ta renmen tande tout repòtaj sa yo, fè klik sou ralonj ki anlè paj la.

XS
SM
MD
LG