Accessibility links

Breaking News

Premye-Minis Jamayiken an Di Sitiyasyon Ayiti a Bay CARICOM Kè-Sote


Nan premye rankont karayibeyen kap fèt nan kad forum entèrameriken sou pati politik yo, Premye-Minis Jamayik la, Percival J. Patterson, fè konnen peyi CARICOM yo gen gwo kè-sote pou fason sitiyasyon politik la ap degrade ann Ayiti, sa ki anpeche ansyen koloni fransèz la vanse nan direksyon yon gouvènman demokratik responsab.

Msye Patterson deklare se nan Jamayik, an 1997, Komunote Ekonomik Karayib la, CARICOM, te pran desizyon pou li admèt Ayiti kòm manm. Lè sa a, òganizasyon an te byen konnen anpil apui tap nesesè pou rasin demokrasi ka pouse ann Ayiti jiskaske peyi sa a ta vin gen yon tradisyon demokratik. Premye-Minis la di CARICOM te kwè patisipasyon Ayiti nan gwoup la tapral ede nan efò sila a e CARICOM te fè konprann klè Ayiti tap gen pou li respekte sèten prensip, pa egzanp fason lap chwazi e chanje gouvènman.

Dirijan jamayiken an ajoute: pozisyon CARICOM nan, ni pozisyon pa l, pa pro-Aristide, men pito anfavè gouvènman pèp ayisyen an chwazi a depi se nan eleksyon lib e demokratik. CARICOM pa pèmèt Ayiti patisipe nan rankont li yo depi Jn-Bertrand Aristide te pèdi pouvwa a an fevriye ane pase nan kondisyon ki te soulve anpil pale-anpil. Eta CARICOM yo divize sou kesyon pou konnen èske òganizasyon an dwe rekonèt gouvènman Latortue a (ke Washington apiye), men plizyè peyi nan rejyon an fè konnen yo dispoze ede Ayiti prepare pwochèn eleksyon yo.

XS
SM
MD
LG