Accessibility links

Breaking News

Spò Aktyalite 4/25/05


Football

Konsèy Asosyasyon Football rejyon Es ak Sant Afrik ekspulse 3 footballè klub Somalyen Elman FC apre yo te atake yon abit. Mohamed Nur Abdi, Osman Wakil ak Abdi Isaq ekspulse nan chanpyona a apre yo te atake abit Tanzanyen Frederick Baijuka apre defèt 3 a 2 ekip la subi devan klub Atletico Burundi Samdi nan Tanzani. 3 footballè yo pat kontan ak desizyon abit la te pran pou l akòde gòl viktwa ekip Burundi a --yon gò l yo kwè ki te ò-je. Sekretè jeneral Konsèy la, Nicholas Musonye di espulsyon an voye yon mesaj bay lòt footballè pou fè yo konnen yo pap tolere jan daksyon sa yo nan konpetisyon an.

Isit Ozetazuni, D.C. United tonbe devan New England Revolution 4 a 3 nan kad rankont lig football balonwon ameriken an ki sot jwen pandan weekend isit Washington. Antrenè New Egland Revolution Steve Nichols di ranpòte yon viktwa an deplasman enpòtan. “Nou rate kèk chans se vre men lè liy datak ak mitan teren an te jwe yon wòl enpòtan nan viktwa e rann situasyon difisil pou D-C United.” Antrenè ki kesyon yon penalite abit la te bay D.C. United pandan arè de je yo, kwè jwè l yo te mye òganize menm lè yo te oblije koule yon beton nan fen 2 zièm mitan an pou kore viktwa a.

D.C. United te domine rankont la nan 20 premye minit la men liy defans vizitè kraze tout atak. Nan yon espas de 5 minit New England te deja ap men-nen 3 a 0 gras ak yon seri de opòtunite yo te jwen nan defans D-C United ki tap penyen lage. Taylor Twellman te louvri skò a pou vizitè yo nan 26 zièm minit rankont la apre li te resevwa yon pas nan men Clint Dempsey. Vizitè yo te ogmante mak la gras ak ekzekusyon yon penalite Sharlrie Joseph ekzekute nan 28 tièm minit. 3 minit apre Marshall Leonard te pwofite yon feblès defans D-C United la. Jaime Moreno te redui skò a sou yon penalite pandan arè de je yo. Asistan antrenè D-C United, Tom Soehn, fè 2 chanjman ki chanje fason ekip kapital la tap jwe. Santino Quaranta ranplase David Stokes ki te pran yon zòbòy epi Freddy Adu ranplase Alecko Eskandarian. D.C. United te multipliye atak yo san yo pa rive egalize e ranpòte la viktwa-yon espwa asistan antrenè a Tom Shoen tap tann:“Nou te kreye anpil chans pou n te remonte a defisi san oken suksè--mwen desu sitou lè w subi yon defèt a domisil.”

Apre viktwa a New England Revolution pran tèt klasman konferans de Lès-la ak 7 pwen men yo make mwens pwen ke New England Revolution. Chikago Fire an 2 zièm pozisyon ak 7 pwen Colombus Crew klase 3 zièm ak 6 pwen. Kansas City gen 4 pwen, D C United an 5 kièm pozisyon ak 4 pwen.Metro Stars an dènye pozisyon ak 2 pwen.

Lòt rezulta nan konferans de Lès la: Chikago Fire tonbe 1 a 0 devan New York Metro Stars. Kolorado Rapids tronse Colombus Crew 2 a 0. Kansas City Wizards tonbe devan San Jose Earthquakes 3 a 2 . Nan konferans de Lwès la F.C Dallas vannen Real Salt Lake 3 a 0. Los Anjeles Galaksi wouze Chivas USA 3 a 1. Nan klasman jeneral la FC Dallas pran tèt klasman an ak 10 pwen.An 2 zièm pozisyon nou jwen Los Anjeles Galaksi ak 6 pwen. San Jose Earthquake gen 5 pwen. Kolorado Rapids gen 4 pwen. REal Salt Lake ak 4 pwen epi Chivas USA nan ke kamyonèt la ak 1 pwen.

Òganizatè koup du mond football Almay 2006 la kontinye ap lanse evètisman bay fanatik yo pou sispann ashte tikè sou sit entènèt ebay akoz yap kouri riks pou pa rantre nan stad la. Tikè koup du mond yo komanse vann sou sit ebay kèk jou responsab yo te kòmanse vann biyè yo. Vis prezidan komite òganizatè a HOrst Schimidt di aksyon yap etudye posibilite pou pran aksyon legal kont moun kap vann tikè sou sit entènèt ebay a Responsab yo di etan done chak tikè gen non moun ki achte l la se pami rezon yo kapab refuze aksè nan stad la tout moun ki tap sèvi ak tikè yon lòt moun. Tikè ki pi chè a koute 780 dola aloske yon tikè òdinè kote sou sit eBay a 1300 dola.

Yon lòt kote Asosyasyon footballè Pwofesyonèl Angle a non-men John Terry, kap jwe nan Chelsea, kòm footballè Asosyasyon football la pou ane a. Terry se premye defansè ki resevwa pri a depi 1993. Wayne Rooney, ki gen 19 van e kap jwe nan Manchester United, resevwa prim pi jèn jwè pwofesyonèl Asosyasyon an. Toujou an Angletè yon viktwa Arsenal devan Tottenham ap pèmèt Chelsea ranpòte chanpyona premyè divizyon lig football Angle a.

An Espay, gras ak yon viktwa 4 a 0 Barselòn ranpòte devan Malaga pèmèt Barselòn repran distans li ak 6 pwen devan Real Madrid menm Madrilè n yo kale Villarreal 2 a 1. Barselon gen pou jwe 3 match kont Valencia, Levante ak Real Sociedad. An Itali Milan A.C ap pare pou resevwa PSV Eindhoven nan kad semi final ale Lig dè chanpyon Europeyen an demen Madi a. Viktwa 3 a 1 Bayern de Munich sot ranpòte devan VFL Bochum prèske asure l 19 vièm tit chanpyona nasyonal premye divizyon lig Football Alman an apre swif Shalke 04 pran nan men Berlen. Viktwa ki mete Bayern ak 9 pwen devan Shalke 04 nan moman manke 3 jounen pou chanpyona a fini.

Klub football Angle Birmingham city anule kontra li te genyen ak atakan Trinidad and Tobago, Dwight Yorke apre 8 mwa. Desizyon an louvri wout la pou Yorke al jwe nan klub Ostralyen Sydney FC. Yorke, ki gen 33 zan, te konn jwe nan Aston Villa, Manchester City ak Blackburn. Msye ap evolye nan lig football Angle a depi 1989.

Basketball

Miami Heat byen demare faz final NBA apre yo woule New Jersey Nets 116 a 98--ekip ki ranpòte 4 nan seri 7 rankont la ap kalifye pou pwochen tou a. Washington Wizards tonbe devan Chikago Bulls 103 a 94--premye patisipasyon Bulls yo nan yon faz final depi 1998 ane Michael Jordan te ede yo ranpòte 6 zièm tit yo nan NBA a.

Nan konferans de Lwès-la Denver Nuggets suprann San Antonio Spurs ak yon viktwa 93 a 87, Phoenix Suns suprann Memphis Grizzlies 114 a 103. Aswè a Indiana Pacers ap rankontre ak Boston Celtics epi Houston Rockets ap akeyi Dallas Mavericks. Boston ak Houston ap domine seri 7 match la 1 viktwa kont 0 defèt.

Tennis

Ameriken Andy Roddick ranpòte tounwa tenis maskulen ki tap dewoule nan Jorji gras ak yon viktwa an 2 manch li ranpòte devan franse Sebastien Grosjean 6-2, 6-2.

Nan koup Konfederasyon an, ekivalan koup Davis, La Frans ap akeyi Espay pandan Etazuni ap fè yon kout pye la kay la Rusi nan kad semi final konpetisyon an. Franse yo elimine Otrich nan seri 5 rankont ki jwe pandan weekend nan ak yon viktwa 4 a 1. Espay bò kote pa l te pran swen Arjantin. La Rusi pat rankontre oken difikilte pou l elimine Itali ak yon viktwa 4 a 1. Etazuni sou bò pa l elimine Beljik ki tap jwe san 2 prensipal vedèt Justine Henin-Hardenne ak Kim Clijsters. Venkè semi final yo ap rankontre nan final koup Konfederasyon an an Septanb ane sa a.

OLYMPIC

Otorite Olenpik yo nan vil Lond retire òf yo te fè semen pase a pou evite yon pwoblèm etik ak komite Olempik entènasyonal la. Òf yo te gen ladann yo vwayaj gratis pou plis pase 10 mil atlèt ak ofisyèl peyi patisipan yo, apèl telefonik gratis, vwayaj an tren ak sejou pou fanmi atlèt yo pandan komite olempik nasyonal yo tap resevwa 50 mil dola pou ede nan antrenman atlèt yo pandan sejou yo nan Grand Bretay avan debu konpetisyon an. Vil Lond. New York, Paris, Moskou ak Madrid ap chache pou òganize je zolenpik yo an lan 2012. Òf vil Lond ak New York te fè te semen pase a te soulve kesyon etik eskandal ki te sakaje mouvman olenpik la an lan 2002 lè vil ameriken Salt Lake te òganize je zolenpik divè yo. Komite etik òganizasyon spòtif entènasyonal dakò ak òf komite òganizatè vil New York te fè pou ede fè pwomosyon pou spò minoritè yo nan tout Etazuni pandan 7 tan kap debouche nan ouvètu je yo si Komite Olenpik la ta seleksyone New York kòm vil òganizatè a-- komite etik la di òf la te fè pati dokuman kandidatu vil la.

Atletisme

Kourè Kenyan Daniel Rono ranpòte maraton ki tap dewoule nan vil Madrid an Espay devan 7 konpatyriòt li. Msye fini kous 42 kilomèt la an 2 zhè--12 minit--29 sekond. Larissa Malikova ranpòte kategori feminen an. Espayòl Julio Rey ranpòte marathon Hambourg la. Kenyan Edith Masai ranpòte kategori feminen an.

Se demen Madi ak Mèkredi Konfederasyon Atletis Afriken an ap òganize 19 vièm kongrè l nan Burundi. 53 federasyon atletis Afriken ap patisipe nan rankont brase lide a en prezans Prezidan Federasyon Atletis Amatè Entènasyonal la Senegalè Lamine Diack. 4 Atlèt China ap antrene nan Univèsite Baylor nan Eta Tekzas nan kad preparatif chinwa yo ap fè pou je zolempik Peken yo an lan 2008.

Natation

Najè Japonè Kosuke Kitajima ki te ranpòte 2 meday dò pandan je zolempik Atè n 2004 yo, ranpòte 6 zièm tit afile kous 100 mèt-bras nan chanpyona nasyonal Japon a ki tap dewoule nan Yokohama.. Msye pap reprezante peyi a nan kous 200 mèt bras la nan konpetisyon natasyon mondyal ki gen pou dewoule nan Montreal Kanada an Juyè ane sa a.

XS
SM
MD
LG