Accessibility links

Spò Aktyalite 03/14/05


Football / Ajax Amsterdam

Efektiv imedyatman Olandè Danny Blind se nouvo antrenè ekip football Olandè Ajax Amsterdam nan plas Ronald Koeman ki demisyone mwa pase a apre klub la te elimine nan koup UEFA a. Bruno Conti se nouvo antrenè AS Ròm. Black Burns ak New Castle, Manchester United ak Arsenal klase pou semi final koup Angletèa a

Blesu se pami rezon ki dèyè desizyon las football arjanten Gabriel Batistuta ap retrèt li apre kontra l ekspire ak klub Al Arabi nan Katar. Msye make 56 gòl nan seleksyon nasyonal pandan 78 rankont. Msye te jwe nan Newells Old Boys, River Plate ak Boca Junior avan li te mete tèt pou Euròp kote li jwe nan klub Italyen Fiorentina, AS Rom ak Inter de Milan.

Klub Football Alman Borussia Dortmund ki ranpòte chanpyona Bundersliga a 6 fwa pase akote pou l ta kriye fayit apre yon group envestisè aprouve yon plan sekou. Dapre atan ki jwen jodi a klub la pap peye lwaye pou stad Westfalen nan pandan 2 zan e lap posede yon pati nan stad la. Dortmund ki klase an 12 pozisyon, kapab gen yon dèt kap rive juska 175 milyon dola disi mitan ane 2 mil 6 la.

Seleksyon football feminen ameriken an fini an premyè pozisyon ak 9 pwen nan group B koup Algarve 2005 la kap dewoule nan Portugal apre viktwa 4 a 0 li ranpòte devan Danmak yè Dimanch la. la Frans kale Finland 2 a 1 toujou nan menm group la. Nan group C a Meksik tonbe plat 5 a 0 devan Angletè. Final la fikse pou demen ant Etazuni ak Almay.

Basketball Univèsitè

Chanpyona nasyonal basketball Univèsitè yo, ki rele Mas an foli akoz yon seri de ti univèsite kapab elimine univèsite ki renonmen nasyonal--tounwa a ap demare jedi sa a patisipasyon 64 Univèsite. Univèsite Maryland pap fè vwayaj la pou la premyè fwa depi 1993. Round dechoukaj la, kap demare Jedi, dwe redui a 16 ekip Dimanch. Semi final nasyonal la ap jwe nan Saint Louis Missouri 2 Avril epi final la fikse pou Lendi 4 Avril.

Tèt de seri yo se Illinois, Washington, Duke ak North Carolina Maryland pral konsole l nan yon tounwa nasyonal sur envitasyon.

Lakay pwofesyonèl yo, nan yon rankont gason pa kanpe Philadelphia 76ers tonbe devan Toronto Raptors 128 a 110 pandan ke Phoenix Suns te monte yon maswife avan yo kale Denver Nuggets 106 a 101 e mete fen nan 8 viktwa afile Nuggets yo sot ranpòte. Phoenix pataje premye plas la ak San Antonio ak 47 viktwa 15 defèt yo chak. Nan yon lòt rankont Boston Celtics, Dallas Mavericks, Los Anjeles Clippers, Houston Rockets, Seattle Supersonics ak Cleveland Cavaliers ranpòte la vikwa--Washington Wizards tonbe devan Boston Celtics 105 a 101.

Tennis

Numewo 1 tenis mondyal maskulen Swis Roger Federer kale ameriken Mardy Fish 6-3, 6-3 nan tounwa Open Pacifik Life la pou-l kalifye pou 3 zièm tou tounwa tenis kap dewoule nan Indians Wells nan Eta Kalirfòni.

Athletisme

Kourè Kenyan Kerron Clement bat rekò an sal tounwa tenis an sal 400 mèt atletis Univèsitè yo kap dewoule nan Fayetteville, Arkansas.

2012 Olympic

Komisyon evaluasyon Koite Olempik Entènasyonal la trouve l nan Moscou kote li pral pase 4 jou pou evalye enstalasyon spòtif vil la ki kandida pou òganize je zolempik yo an lan 2012. Moskou se dènye etap vizit delegasyon an apre yo vinn vizite Madrid, Lond, New York ak Pari. Komite Olempik la ap anonse gayan an 6 Juyè nan Sengapour.

Rome Marathon

Kourè Italyen Alberico Di Cecco ranpòte maraton vil Rom-nan. Rus Silviya Skvortsova ranpòte kategori feminen an.

Lisbon Half-Marathon

Kourè Kenyan Paul Tergat ranpòte semi maraton Lisbon nan.

Siklis

Siklis Ameriken Bobby Julich tounen premye ameriken ki ranpòte kous bisiklèt Pari Nice/la.

XS
SM
MD
LG